ग्यास बिक्रेता महासंघले भन्यो: सरकार प्रचारबाजी लाग्यो, गम्भीर भएन

काठमाडौं । ग्यास बिक्रेता महासंघले लामो समयदेखि जारी खाना पकाउने ग्यासको चरम अभावप्रति सरकार गम्भीर नभएको आरोप लगाएको छ। महासंघले समस्या समाधान गर्नुपर्ने बेला सरकार प्रचारबाजीमा केन्द्रित भएको दाबी गरेको हो।

महासंघका अध्यक्ष ज्ञानेश्वर अर्यालले आइतबार विज्ञप्ति जारी गर्दै देशभर खाना पकाउने ग्यासको चरम अभाव रहेको विषय सर्वविदित हुँदाहुँदै पनि सरकारले अभावको वास्तविक कारण पहिचान गरी समाधान गर्न प्रभावकारी कदम नचालेको बताएका छन्।

महासंघले विगत चार महिनामा करिब ६० हजार मेट्रिक टन ग्यास कम आयात भएको जनाएको छ। आयातमा आएको ठूलो गिरावट नै बजारमा ग्यास अभाव हुनुको मुख्य कारण रहेको महासंघको दाबी छ।

विज्ञप्तिमा विभिन्न सञ्चारमाध्यम तथा उपभोक्तावादी संघसंस्थामार्फत ग्यास अभावका कारणबारे स्पष्ट जानकारी सार्वजनिक गरिए पनि सरकार, नेपाल आयल निगम, वाणिज्य मन्त्रालय तथा सम्बन्धित सरकारी निकायले समस्या समाधानमा पर्याप्त ध्यान नदिएको आरोप लगाइएको छ।

‘देशभर खाना पकाउने ग्यासको चरम अभाव भएको सर्वविदितै छ। यति लामो समयसम्म ग्यास किन अभाव भयो भन्ने कुरामा सरकारको पटकपटक ध्यान पुगेको देखिन्न,’ विज्ञप्तिमा भनिएको छ।

महासंघले सरकारी निकायले समस्या समाधानभन्दा अनावश्यक प्रचारबाजीलाई प्राथमिकता दिएको आरोपसमेत लगाएको छ। पछिल्ला दिनमा भएका गतिविधिले सरकारको प्राथमिकता समस्या समाधानभन्दा प्रचारमा बढी केन्द्रित भएको पुष्टि गरेको महासंघको भनाइ छ।

महासंघका अनुसार हाल बजारमा आवश्यकताभन्दा बढी अर्थात् करिब ८० लाख सिलिन्डर विभिन्न स्थानमा छरिएका छन्। पर्याप्त संख्यामा सिलिन्डर बजारमा रहे पनि नियमित आपूर्ति तथा वितरण प्रणाली प्रभावकारी नहुँदा उपभोक्ताले ग्यास अभाव झेल्नुपरेको संकेत महासंघले गरेको छ।

ग्यासको सहज आपूर्ति र वितरणका लागि महासंघले केही सुधारात्मक कदम चाल्न सरकारसँग माग गरेको छ। ग्यास उद्योग तथा विभिन्न नाममा सञ्चालित बिक्री केन्द्रबाट हुने बिक्री तत्काल बन्द गरी डिलरमार्फत मात्रै ग्यास बिक्री वितरणलाई व्यवस्थित बनाउनुपर्ने महासंघको माग छ।

त्यस्तै, अनुगमनका नाममा ग्यास बिक्रेतालाई अनावश्यक दुःख दिने कार्य बन्द गर्न पनि महासंघले आग्रह गरेको छ। अभावको वास्तविक कारण पहिचान गरी आयात तथा वितरण प्रणालीलाई प्रभावकारी बनाउन सरकार, नेपाल आयल निगम र सम्बन्धित निकायबीच समन्वय आवश्यक रहेको महासंघको भनाइ छ।

महासंघले तत्काल आपूर्ति व्यवस्थापन सुधार नगरे ग्यास अभावको समस्या अझै लम्बिन सक्ने भन्दै सरकारलाई गम्भीर भएर समस्या समाधानमा केन्द्रित हुन आग्रह गरेको छ।