सेतो खबर
काठमाडौं । मेडिकल व्यवसायी दुर्गा प्रसाईं र धवलशम्शेर राणाबीच नयाँ राजनीतिक दल निर्माणको विषयमा दरार उत्पन्न भएको छ । नयाँ पार्टी गठनका लागि एकै ठाउँमा उभिएका उनीहरू पार्टी दर्ता नहुँदै अलग भएका हुन् ।
प्रसाईं र राणाबीच सभापतिमा धवलशम्शेर राणा तथा सर्वोच्च नेतामा दुर्गा प्रसाईं रहनेगरी ‘जय नेपाल पार्टी’ गठन गर्ने सहमति भएको थियो । तर पार्टीभित्रको वरीयता, जिम्मेवारी बाँडफाँडलगायतका विषयमा कुरा नमिलेपछि उनीहरूबीच मतभेद बढेको बताइएको छ ।
मतभेदपछि राणाले छुट्टै राजनीतिक दल गठन गर्ने तयारी गरेका छन् । शुक्रबार उनी नयाँ दल दर्ताका लागि निर्वाचन आयोग जाने तयारीमा रहेको बताइएको छ ।
यता प्रसाईंले पनि छुट्टै पार्टी गठन गर्ने संकेत गरेका छन् । उनले शुक्रबार कलंकीस्थित शिखर पार्टी प्यालेसमा कार्यक्रम आयोजना गर्दै आफ्नो राजनीतिक धारणा सार्वजनिक गर्ने तयारी गरेका छन् ।
प्रसाईंले सामाजिक सञ्जाल फेसबुकमार्फत नयाँ पार्टी निर्माणको संकेत गर्दै वैदिक सनातनी हिन्दु अधिराज्यसहित देशका पीडित, शोषित, उत्पीडित तथा आम नागरिकको हक, अधिकार र न्यायका लागि नयाँ पार्टी खोल्ने बताएका छन् ।
उनले नयाँ बन्ने पार्टी सबै नेपाली नागरिक, जातजाति र धर्मको साझा पार्टी हुने दाबी गरेका छन् । प्रसाईंले लेखेका छन्, ‘अब बन्ने हाम्रो पार्टी सबै नेपाली नागरिकहरूको, सबै जातजाति र सबै धर्मको साझा पार्टी बन्नेछ। केही समय धैर्य गर्नुहोला। तपाईँ हाम्रो पार्टी छिट्टै खुल्नेछ।’
यसअघि एउटै राजनीतिक दल निर्माण गर्ने तयारीमा रहेका प्रसाईं र राणाबीच पार्टीको नेतृत्व र सांगठनिक संरचनालाई लिएर विवाद उत्पन्न भएपछि उनीहरूको सहकार्य टुटेको हो । पार्टी नै औपचारिक रूपमा दर्ता हुनुअघि दुई पक्ष अलग भएपछि अब उनीहरूले छुट्टाछुट्टै राजनीतिक दल अघि बढाउने भएका छन्।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
