सेतो खबर
ढाका । बंगलादेशमा सम्पन्न संसदीय चुनावको मतगणना जारी रहँदा तारिक रहमान नेतृत्वको बंगलादेश नेशनलिस्ट पार्टी (बीएनपी) ले बहुमतको सिट संख्या पार गरेको प्रारम्भिक नतिजाले देखाएको छ। १७ वर्ष लामो निर्वासनपछि स्वदेश फर्किएका रहमानको पार्टीले स्पष्ट अग्रता लिएसँगै उनी प्रधानमन्त्री बन्ने लगभग निश्चित भएको विश्लेषकहरूले बताएका छन्।
यससँगै बंगलादेशी राजनीतिमा नयाँ अध्याय सुरु भएको चर्चा भइरहेको छ।
तारिक रहमान को हुन्?
तारिक रहमान पूर्व प्रधानमन्त्री खालिदा जिया र पूर्व राष्ट्रपति जियाउर रहमान का जेठा छोरा हुन्। सन् १९६५ नोभेम्बर २० मा ढाकामा जन्मिएका उनी बाल्यकालदेखि नै राजनीतिक परिवेशमा हुर्किएका थिए।
सन् १९७१ को बंगलादेश मुक्ति युद्धका क्रममा उनी बालक अवस्थामै केही समय हिरासतमा परेका थिए। त्यसैलाई आधार बनाएर बीएनपीले उनलाई “युद्धका कान्छा कैदीहरूमध्ये एक” को रूपमा प्रस्तुत गर्दै आएको छ।
उनका पिता जियाउर रहमान बीएनपीका संस्थापक तथा राष्ट्रपतिको रूपमा स्थापित भए भने उनकी आमा खालिदा जिया तीन पटक प्रधानमन्त्री भइन्। सन् १९९१ मा बीएनपी पुनः सत्तामा फर्किँदा तारिकले संगठन विस्तारमा सक्रिय भूमिका खेलेका थिए।
१७ वर्षको निर्वासन र कानुनी संघर्ष
तारिक रहमानले विगतमा दर्जनौं आपराधिक तथा भ्रष्टाचारसम्बन्धी आरोप सामना गरेका थिए। उनीमाथि करिब ८४ वटा मुद्दा दर्ता भएको उल्लेख गरिन्छ। सन् २००७ मा सेना समर्थित अन्तरिम सरकारले उनलाई पक्राउ गरेको थियो।
जेल जीवनका क्रममा उनले यातना भोगेको दाबी गर्दै आएका छन्। सन् २००८ मा जमानतमा रिहा भएपछि उपचारको बहानामा लन्डन गएका उनी १७ वर्षसम्म त्यहीँबाट पार्टी नेतृत्व गर्दै स्व–निर्वासनमा बसे।
उनले भिडियो कन्फरेन्स, सामाजिक सञ्जाल र डिजिटल माध्यममार्फत पार्टी सञ्चालन गर्दै आएका थिए।
राजनीतिक पुनरागमन
सन् २०२४ मा शेख हसिना नेतृत्वको सरकार पतन भएपछि बंगलादेशको राजनीतिक तथा कानुनी वातावरणमा ठूलो परिवर्तन आएको बताइन्छ। त्यसपछि अदालतबाट धेरै मुद्दामा उनी निर्दोष ठहर भएका थिए।
लामो निर्वासनपछि सन् २०२५ डिसेम्बरमा उनी स्वदेश फर्किएका थिए। फर्किनुअघि उनले अन्तरिम सरकारका प्रमुख मुहम्मद युनुस सँग भेटवार्ता गरेका थिए। त्यसलाई बंगलादेशी राजनीतिमा सम्भावित शक्ति–सन्तुलन परिवर्तनको संकेतका रूपमा हेरिएको थियो।
चुनावी सफलता
१३ औँ संसदीय चुनावमा तारिक रहमानले ढाका–१७ र बोगुरा–६ दुवै क्षेत्रमा उल्लेखनीय अन्तरले जित हासिल गरेका छन्। बोगुरा उनको पारिवारिक राजनीतिक गढ मानिन्छ भने ढाका–१७ राजधानीको महत्वपूर्ण निर्वाचन क्षेत्र हो।
हालसम्म सार्वजनिक प्रारम्भिक नतिजाअनुसार बीएनपीले १५१ सिट जितिसकेको छ र अन्य थुप्रै क्षेत्रमा अग्रता कायम राखेको छ।
विश्लेषकहरूका अनुसार, निर्वासन, मुद्दा र राजनीतिक संकट पार गर्दै सत्ता नजिक पुग्नु तारिक रहमानको लागि ऐतिहासिक मोड हो। अब औपचारिक परिणाम घोषणापछि उनको प्रधानमन्त्री पदमा नियुक्ति प्रक्रिया अघि बढ्ने अपेक्षा गरिएको छ।
युवराज गौतम / काठमाडौँ । मुलुकमा यतिबेला प्रतिनिधि सभा निर्वाचनको तयारी भइरहेको छ । आगामी फागुन २१ गतेका लागि तोकिएको निर्वाचनमा विदेशमा बस्ने नेपालीहरुलाई कसरी सहभागि... विस्तृतमा
