काठमाडौं आइपुगे पुर्वराज ज्ञानेन्द्र शाह, समर्थकहरुको नाराः ‘राजा आउँ देश बचाउँ’

काठमाडौं । पूर्वराजा ज्ञानेन्द्र शाह शुक्रबार झापाबाट काठमाडौं आइपुगेका छन्। पछिल्लो चार महिनादेखि झापाको दमक क्षेत्रमा बसोबास गर्दै आएका शाह राजधानी फर्किएसँगै राजनीतिक तथा सामाजिक वृत्तमा पुनः चासो बढेको छ।

उनी त्रिभुवन अन्तर्राष्ट्रिय विमानस्थल मार्फत काठमाडौं आएका हुन्। विमानस्थल परिसरमा उनको स्वागतका लागि बिहानैदेखि समर्थकहरू भेला हुन थालेका थिए। राष्ट्रिय झण्डा बोकेका समर्थकहरूले राजसंस्था पुनःस्थापनाको पक्षमा नाराबाजीसमेत गरेका थिए।

पूर्वराजाको स्वागतका लागि राष्ट्रिय प्रजातन्त्र पार्टी (राप्रपा) ले आफ्ना कार्यकर्ता तथा समर्थकलाई विमानस्थल उपस्थित हुन आह्वान गरेको थियो। त्यस्तै, दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति तथा नागरिक बचाउ महाअभियान’ लगायत विभिन्न राजावादी समूहहरूले पनि स्वागत कार्यक्रमको तयारी गरेका थिए।

समर्थकहरुले राजा आउँ देश बचाउँको नारा लगाएका छन् ।

समर्थकहरूको उपस्थिति बढेपछि विमानस्थल क्षेत्रमा सुरक्षा व्यवस्था कडा पारिएको थियो। नेपाल प्रहरी र सशस्त्र प्रहरीको बाक्लो उपस्थिति राखिएको थियो भने यात्रु आवागमनलाई सहज बनाउन सुरक्षाकर्मीहरूले भीड व्यवस्थापन गरेका थिए। केही समय नाराबाजी भए पनि स्थिति नियन्त्रणमै रहेको सुरक्षा स्रोतले जनाएको छ।

पूर्वराजा ज्ञानेन्द्र पछिल्लो समय देशका विभिन्न जिल्लामा धार्मिक, सांस्कृतिक तथा सामाजिक कार्यक्रमहरूमा सहभागी हुँदै आएका छन्। उनले मन्दिर दर्शन, धार्मिक सभामा सहभागिता र स्थानीय भेटघाटलाई निरन्तरता दिएका छन्।

काठमाडौं फर्किएसँगै आगामी दिनमा पनि विभिन्न धार्मिक तथा सामाजिक कार्यक्रममा उनको सहभागिता रहने जनाइएको छ। राजावादी समूहहरू भने पूर्वराजाको सक्रियतासँगै आफ्ना गतिविधि थप सशक्त बनाउने तयारीमा देखिएका छन्।