सेतो खबर
काठमाडौं । नेपाली सेनाले अधिकृत क्याडेट (सहायक सेनानी) पदका लागि २८० जनाको दरखास्त आह्वान गरेको छ।
नेपाली सेनाको भर्ना छनोट निर्देशनालय, जङ्गी अड्डाले खुला तथा समावेशी प्रतिस्पर्धाबाट पदपूर्ति गर्ने गरी शुक्रबार सूचना प्रकाशित गरेको हो। माग गरिएको संख्यामध्ये खुलातर्फ १४६, महिलातर्फ २४, आदिवासी/जनजातितर्फ ३९, मधेसीतर्फ ३३, दलिततर्फ १८, पिछडिएको क्षेत्रतर्फ ६ तथा कर्तव्य पालनाका क्रममा मृत्यु भएका वा शारीरिक रूपमा अशक्त सैनिकका सन्ततिका लागि १४ पद छुट्याइएको छ।
योग्यता पुगेका इच्छुक नेपाली नागरिकले नेपाली सेनाको आधिकारिक वेबसाइटमार्फत अनलाइन आवेदन दिन सक्नेछन्। साउन २९ गतेदेखि भदौ १८ गतेसम्म नियमित दस्तुरमा र भदौ १९ देखि २५ गतेसम्म दोब्बर दस्तुर तिरेर आवेदन दिन सकिनेछ। आवेदन दस्तुर १ हजार रुपैयाँ तोकिएको छ। एकभन्दा बढी समावेशी समूहमा आवेदन दिने उम्मेदवारले प्रत्येक थप समूहका लागि २० प्रतिशत अतिरिक्त दस्तुर बुझाउनुपर्नेछ।
कक्षा १२ उत्तीर्ण उम्मेदवारको उमेर दरखास्तको अन्तिम मिति भदौ २८ गतेसम्म १८ वर्ष पूरा भई २१ वर्ष ननाघेको हुनुपर्नेछ। स्नातक उत्तीर्ण उम्मेदवारको हकमा १८ वर्ष पूरा भई २४ वर्ष ननाघेको र बहालवाला सैनिक उम्मेदवारको हकमा २६ वर्ष ननाघेको हुनुपर्नेछ।
उम्मेदवारले काठमाडौंको स्वयम्भूस्थित केन्द्रीय भर्ना छनोट केन्द्रका साथै इटहरी, बर्दिबास, हेटौंडा, पोखरा, बुटवल, सुर्खेत र दीपायलस्थित पृतना हेडक्वार्टरमध्ये आफूलाई पायक पर्ने केन्द्रबाट आवेदन प्रक्रिया पूरा गर्न सक्नेछन्।
छनोट प्रक्रियामा शारीरिक परीक्षा, लिखित परीक्षा, गुणमापक परीक्षा र अन्तर्वार्ता समावेश हुने सेनाले जनाएको छ। अनलाइन फाराम भरेपछि आवश्यक कागजातसहित सम्बन्धित भर्ना केन्द्रमा स्वयं उपस्थित भई दर्ता गराउनुपर्नेछ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
