सेतो खबर
काठमाडौं । नेपाली कांग्रेसका पूर्वसभापति शेरबहादुर देउवाले पार्टीको विशेष महाधिवेशन आफूले नचाहेको र आफ्नो असहमतिका बाबजुद जबर्जस्ती आयोजना गरिएको बताएका छन्।
काठमाडौंमा आयोजित विशेष महाधिवेशनको समापन समारोहलाई सम्बोधन गर्दै देउवाले आफूले सुरुदेखि नै सबैको सहमतिमा विशेष महाधिवेशन गर्नुपर्ने धारणा राख्दै आएको बताए। तर आफ्नो असहमतिका बीच महाधिवेशन आयोजना गरिएको उनको भनाइ छ।
देउवाले विशेष महाधिवेशनका क्रममा कांग्रेसका धेरै नेता तथा कार्यकर्तालाई बाहिर राखिएको दाबी गरे। आफूहरूले त्यसविरुद्ध अदालतको ढोका ढकढक्याएको र मुद्दाको अन्तिम फैसला आउन बाँकी रहेको उनले बताए।
‘विशेष अधिवेशनलाई मैले मानेको पनि थिइनँ। सबैको सहमतिमा विशेष महाधिवेशन गरौँ भनेको थिएँ,’ देउवाले भने, ‘जबर्जस्ती गरेर धेरै साथीलाई बाहिर राखियो। अदालत गयौँ। अदालतको निर्णय आउन बाँकी छ।’
उनले पार्टीभित्रको विवाद समाधानका लागि सहमतिको बाटो रोज्नुपर्ने धारणा दोहोर्याउँदै विशेष महाधिवेशनमा आफूहरूको असहमति रहेको स्पष्ट पारे।
सम्बोधनका क्रममा देउवाले न्यायालयप्रति आफूलाई पूर्ण विश्वास रहेको पनि बताए। उनले विगतमा राजाको शासनकालमा आफूलाई सर्वोच्च अदालतले थुनामुक्त गरेको प्रसंग स्मरण गर्दै अहिले पनि न्यायालयले न्याय दिने विश्वास व्यक्त गरे।
‘सर्वोच्चले राजाले थुन्दा पनि छुटाएको हो। अहिले पनि न्यायालयले मलाई बचाएको छ। जसको कारणले म नेपालमा आएको छु,’ देउवाले भने।
अदालतमा विचाराधीन विषयमा धेरै टिप्पणी गर्न आवश्यक नरहेको पनि देउवाको भनाइ थियो। उनले न्यायालयले निष्पक्ष निर्णय गर्ने विश्वास व्यक्त गर्दै कांग्रेसको वर्तमान विवाद कानुनी प्रक्रियाबाट समेत टुंगो लाग्ने संकेत गरे।
विशेष महाधिवेशनलाई लिएर नेपाली कांग्रेसभित्र देखिएको विवाद पछिल्लो समय थप पेचिलो बनेको छ। एक पक्षले विशेष महाधिवेशनलाई पार्टीको वैधानिक प्रक्रिया भएको दाबी गर्दै आएको छ भने देउवा पक्षले त्यसको वैधानिकतामाथि प्रश्न उठाउँदै आएको छ। अदालतमा समेत यस विषयमा मुद्दा विचाराधीन रहेकाले आगामी निर्णयलाई चासोका साथ हेरिएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
