सेतो खबर
काठमाडौं । भारतीय सेनाका उपप्रमुख लेफ्टिनेन्ट जनरल धीरज सेठ आज नेपाल भ्रमणमा आउँदैछन्। नेपालका प्रधानसेनापति अशोकराज सिग्देलको निमन्त्रणामा उनी पाँचदिने औपचारिक भ्रमणका लागि काठमाडौं आउन लागेका हुन्।
नेपाल भ्रमणका क्रममा सेठलाई नेपाली सेनाको मानार्थ महारथीको दर्जा प्रदान गर्ने कार्यक्रम रहेको छ। नेपाल र भारतका सेना प्रमुखलाई एक–अर्काको देशमा मानार्थ सैन्य दर्जा प्रदान गर्ने परम्परा रहँदै आएको छ। सन् २०२४ नोभेम्बरमा तत्कालीन भारतीय प्रधानसेनापति जनरल उपेन्द्र द्विवेदीलाई नेपालका राष्ट्रपति रामचन्द्र पौडेलले नेपाली सेनाको मानार्थ महारथीको दर्जा प्रदान गरेका थिए।
त्यसैगरी, २०२४ डिसेम्बरमा नेपाली सेनाका प्रधानसेनापति अशोकराज सिग्देललाई भारतीय राष्ट्रपति द्रौपदी मुर्मूले भारतीय सेनाको मानार्थ जनरलको दर्जा प्रदान गरेकी थिइन्।
सेठको नेपाल भ्रमणलाई दुई देशबीचको परम्परागत सैन्य सम्बन्ध र सहकार्यलाई निरन्तरता दिने महत्वपूर्ण भ्रमणका रूपमा हेरिएको छ।
नेपाल बसाइका क्रममा उनले नेपाली सेनाका प्रधानसेनापति सिग्देलसहित उच्च सरकारी तथा सुरक्षा अधिकारीसँग भेटवार्ता गर्ने कार्यक्रम रहेको छ। भ्रमणका क्रममा दुई देशबीचको रक्षा सहकार्य, सैन्य सम्बन्ध तथा पारस्परिक हितका विषयमा छलफल हुने अपेक्षा गरिएको छ।
सेठले भारतीय सेनाको उपप्रमुखको जिम्मेवारी १ अप्रिल २०२६ देखि सम्हालिरहेका छन्। उनी यसअघि भारतीय सेनाको दक्षिणी कमान्डका कमान्डर थिए।
उनको नेपाल भ्रमण भारतीय सेनामा उच्च जिम्मेवारी सम्हालेपछि पहिलो विदेश भ्रमणसमेत हो।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
