अचानक दुब्लाएपछि सोहेल खानको लुक चर्चामा, स्वास्थ्यबारे उठ्यो प्रश्न

काठमाडौं । बलिउड अभिनेता तथा निर्माता सोहेल खान पछिल्लो समय आफ्नो बदलिएको शारीरिक बनावटका कारण चर्चामा छन्। केही समययता सार्वजनिक भएका उनका तस्बिर तथा भिडियोमा उनी पहिलेको तुलनामा निकै दुब्लो देखिएपछि सामाजिक सञ्जालमा उनको स्वास्थ्य अवस्थाबारे विभिन्न चर्चा हुन थालेको छ।

विशेषगरी उनको अनुहार र शरीरमा आएको परिवर्तनलाई लिएर प्रशंसकहरूले चासो व्यक्त गरेका छन्। सामाजिक सञ्जालमा केही प्रयोगकर्ताले सोहेलको स्वास्थ्यमा कुनै समस्या आएको हुनसक्ने अनुमान गरेका छन् भने कतिपयले उनको तौल घट्नुको कारणबारे प्रश्न उठाएका छन्।

सोहेलको पछिल्लो लुकलाई लिएर सामाजिक सञ्जालमा विभिन्न किसिमका अड्कलबाजीसमेत भएका छन्। कतिपय प्रयोगकर्ताले तौल घटाउन प्रयोग गरिने औषधि तथा सप्लिमेन्टको प्रयोगसँग उनको परिवर्तनलाई जोडेर हेरेका छन्। तर यस्ता अनुमानको कुनै आधिकारिक पुष्टि भने भएको छैन।

सोहेल खानले भने आफ्नो तौल घटेको विषयमा स्पष्टीकरण दिँदै आफूले तौल घटाउन Ozempic वा कुनै फ्याट–बर्निङ सप्लिमेन्ट प्रयोग नगरेको बताएका छन्। उनले आफ्नो शारीरिक परिवर्तनलाई नियमित फिटनेस, व्यायाम र अनुशासित जीवनशैलीसँग जोड्दै आएका छन्।

फिटनेसमा लामो समयदेखि रुचि राख्दै आएका सोहेलले आफ्नो शरीरलाई स्वस्थ र फिट राख्न व्यायाम तथा खानपानमा ध्यान दिने गरेका छन्। पछिल्लो समय उनको तौल उल्लेख्य रूपमा घटेका कारण अनुहारमा समेत परिवर्तन देखिएको हो।

उनको नयाँ लुक सार्वजनिक भएपछि केही सामाजिक सञ्जाल प्रयोगकर्ताले नकारात्मक टिप्पणीसमेत गरेका छन्। सोहेलको बदलिएको रूपलाई लिएर ट्रोलिङ भएपछि बलिउडसँग सम्बन्धित केही व्यक्तिले उनको व्यक्तिगत रूप र स्वास्थ्यलाई लिएर अनावश्यक टिप्पणी नगर्न आग्रह गरेका छन्।

अभिनेता अस्मित पटेलले समेत सोहेलको लुकलाई लिएर भइरहेको ट्रोलिङप्रति असन्तुष्टि जनाएका छन्। उनले सामाजिक सञ्जाल प्रयोगकर्तालाई कसैको शारीरिक बनावट वा उमेरलाई लिएर टिप्पणी गर्नुअघि संवेदनशील हुन आग्रह गरेका छन्।

सोहेल खानको स्वास्थ्यमा गम्भीर समस्या रहेको भन्ने कुनै आधिकारिक जानकारी भने सार्वजनिक भएको छैन। त्यसैले सामाजिक सञ्जालमा फैलिएका अनुमानकै आधारमा उनको स्वास्थ्य अवस्थाबारे निष्कर्ष निकाल्न उचित हुँदैन।

सोहेल खान पछिल्लो समय अभिनयभन्दा पनि निर्माण तथा आफ्नो व्यक्तिगत जीवनमा बढी केन्द्रित छन्। सलमान खानका भाइसमेत रहेका सोहेलले अभिनयसँगै फिल्म निर्माण र निर्देशनमा पनि काम गरिसकेका छन्। उनको बदलिएको लुक भने अहिले सामाजिक सञ्जालमा चर्चाको विषय बनेको छ।