खुश्वुलाई अर्थमन्त्रीको जवाफः हामी १–१ घण्टाको स्टक मार्केट हेर्दैनौं, युगयुगको लागि दूरगामी नीतिमा काम गछौं

काठमाडौं । अर्थमन्त्री डा. स्वर्णिम वाग्लेले सरकारले अघि बढाइरहेको ठूलो आर्थिक अनियमितता तथा वित्तीय विचलनसम्बन्धी अनुसन्धानका कारण केही लगानीकर्ता त्रसित हुँदा पूँजी बजार प्रभावित भएको हुन सक्ने बताएका छन्।

प्रतिनिधिसभाको बैठकमा सांसदहरूले उठाएका प्रश्नको जवाफ दिँदै अर्थमन्त्री वाग्लेले हाल सरकार एक खर्ब रुपैयाँभन्दा बढी बिगो दाबी गरिएको बहुचर्चित आर्थिक अनियमितता प्रकरणको अनुसन्धानमा केन्द्रित रहेको बताए। उनका अनुसार उक्त प्रकरणको सम्बन्ध पूँजी बजार, बीमा क्षेत्र तथा धितोपत्र कारोबारसँग जोडिएको छ।

उनले विगत एक दशकभन्दा बढी समयदेखि विभिन्न क्षेत्रमा मौलाउँदै आएको आर्थिक विकृति र अनियमिततालाई नियन्त्रण गर्ने प्रयास भइरहेको उल्लेख गर्दै अनुसन्धानको दायरा विस्तार भइरहेकाले केही व्यक्तिहरू आफू पनि अनुसन्धानको घेरामा पर्न सक्ने आशंकाले सतर्क बनेको बताए।

“पूँजी बजार, बीमा र धितोपत्र क्षेत्रसँग जोडिएको ठूलो विचलनको विषयमा अहिले एक खर्बभन्दा बढी बिगो दाबी गरेर मुद्दा चलिरहेको छ। देशलाई नै हल्लाउने र भित्रभित्रै मक्किएको अवस्थालाई सुधार गर्ने प्रयास भइरहेको छ,” अर्थमन्त्री वाग्लेले संसद्मा भने, “अनुसन्धानको दायरा बढ्दै जाँदा म पनि पर्छु कि, हामी पनि तानिन्छौँ कि भन्ने त्रास केही लगानीकर्तामा देखिएको हुन सक्छ।”

अर्थमन्त्री वाग्लेले सरकार सुशासन र पारदर्शितालाई प्राथमिकतामा राखेर अघि बढिरहेको उल्लेख गर्दै विगत १०–१५ वर्षदेखि चलिआएका आचरणगत तथा नियतगत समस्यामाथि कडाइका साथ निगरानी भइरहेको बताए। त्यसका कारण केही लगानीकर्ताले तत्काल निर्णय नगरी ‘वेट एन्ड वाच’ रणनीति अपनाएको हुन सक्ने उनको भनाइ थियो।

शेयर बजारमा देखिएको उतारचढावबारे टिप्पणी गर्दै उनले सरकार दैनिक वा घण्टैपिच्छे बजार सूचकांकको उतारचढावमा केन्द्रित नभई दीर्घकालीन आर्थिक सुधारमा केन्द्रित रहेको स्पष्ट पारे।

“हामी एक–एक घण्टामा शेयर बजारको सूचकांक माथि गयो कि तल गयो भनेर हेरेर नीति बनाउँदैनौँ,” उनले भने, “हामी युगौँसम्म प्रभाव पार्ने दूरगामी नीति, सुशासन र संस्थागत सुधारमा काम गरिरहेका छौँ।”

अर्थमन्त्रीको अभिव्यक्तिलाई लिएर संसद् र आर्थिक क्षेत्रमा मिश्रित प्रतिक्रिया देखिएको छ। कतिपयले बजारमा विश्वासको वातावरण कायम गर्न सरकार थप स्पष्ट हुनुपर्ने बताएका छन् भने अर्कोतर्फ आर्थिक अपराधमाथिको अनुसन्धानलाई प्रभावकारी बनाउनु आवश्यक रहेको धारणा पनि व्यक्त गरिएको छ।

पछिल्ला केही समययता नेपाल स्टक एक्सचेन्ज (नेप्से) परिसूचकमा निरन्तर दबाब देखिँदै आएको छ। लगानीकर्ताहरूले सरकारको आर्थिक नीति, बजारमा तरलता, ब्याजदर तथा नियामकीय वातावरणलाई शेयर बजारको अवस्थासँग जोडेर हेर्ने गरेका छन्।