सेतो खबर
काठमाडौं । राष्ट्रिय परीक्षा बोर्ड (एनईबी) ले कक्षा १२ को वार्षिक परीक्षाको नतिजा सार्वजनिक गरेको छ। शुक्रबार बिहान बसेको बोर्ड बैठकले नतिजा अनुमोदन गरेसँगै सार्वजनिक गरिएको हो।
बोर्डका अनुसार यस वर्ष नियमिततर्फ ६९.७५ प्रतिशत विद्यार्थी उत्तीर्ण भएका छन्। नतिजाअनुसार १७ हजार ७ सय ८६ जना विद्यार्थीले ३.६१ देखि ४.०० जिपिए प्राप्त गरेका छन्, जुन उच्च शैक्षिक उपलब्धिका रूपमा हेरिएको छ।
यस वर्ष देशभरबाट सहभागी विद्यार्थीहरूको नतिजा सार्वजनिक भएसँगै विद्यार्थी तथा अभिभावकमा उत्साह छाएको छ। बोर्डले परीक्षाको उत्तरपुस्तिका परीक्षण, सम्परीक्षण तथा नतिजा प्रशोधन कार्य समयमै सम्पन्न गरेर नतिजा सार्वजनिक गरेको जनाएको छ।
शुक्रबार सार्वजनिक भएको कक्षा १२ को नतिजा विद्यार्थीहरुले राष्ट्रिय परीक्षा बोर्डको वेबसाईट वा नेपाल टेलिकमको (neb.ntc.net.np) मा लगइन गरेर हेर्न सक्नेछन ।
नतिजा हेर्नका लागि विद्यार्थीहरूले NEB टाइप गरी स्पेस दिएर आफ्नो सिम्बोल नम्बर लेखी १६०० मा एसएमएस पठाउन सक्नेछन्। त्यसैगरी १६०१ नम्बरमा डायल गरेर पनि नतिजा थाहा पाउन सकिने बोर्डले जनाएको छ।
बोर्डले नतिजासम्बन्धी थप विवरण तथा तथ्यांक क्रमशः सार्वजनिक गर्ने जनाएको छ। नतिजा सार्वजनिक भएसँगै अब उच्च शिक्षामा भर्ना प्रक्रिया र विभिन्न शैक्षिक संस्थाहरूको नयाँ शैक्षिक सत्रको तयारीले गति लिने अपेक्षा गरिएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
