समाचार कक्षमै प्रहरी प्रवेश गरेर पत्रकार पक्राउ, महासंघले भन्यो– राज्य आतंक

काठमाडौं । नेपाल पत्रकार महासंघले सञ्चारमाध्यमका समाचार कक्षबाटै पत्रकारलाई पक्राउ गर्ने तथा नियन्त्रणमा लिने कार्य तत्काल रोक्न सरकारसँग माग गरेको छ।

महासंघले समाचार लेखेकै आधारमा पत्रकारलाई कार्यालयभित्रै प्रवेश गरेर पक्राउ गर्नु संविधान, प्रेस स्वतन्त्रता र अन्तर्राष्ट्रिय कानुनविपरीत भएको भन्दै आपत्ति जनाएको हो।

नेपाल पत्रकार महासंघका महासचिव रामप्रसाद दाहालले समाचार कक्षबाट पत्रकारलाई नियन्त्रणमा लिने कार्यलाई राज्य आतंकको संज्ञा दिएका छन्।

उनले पछिल्लो घटनाक्रमले सञ्चारमाध्यममा त्रास सिर्जना गरेको भन्दै यस्तो कार्य तत्काल रोक्न सरकारलाई आग्रह गरेका छन्।

दाहालले भने, “यो अकस्मात् राज्य आतंक सुरु भएको देखिएको छ। हरेक समाचार कक्षमा बर्दीधारी प्रहरी गएर समाचार कक्षबाट पत्रकारलाई नियन्त्रणमा लिने कुरा नेपालको संविधान, प्रेस स्वतन्त्रता र अन्तर्राष्ट्रिय कानुनहरूको उल्लंघन हो। यसलाई तत्काल रोक्नुपर्छ। राज्य आतंक नरोकिए यो खेदजन्य कार्यविरुद्ध आन्दोलित हुनुको विकल्प छैन।”

शुक्रबार प्रहरीले नेपाल प्रेसमा कार्यरत पत्रकार विश्वमणि सुवेदीलाई नयाँबानेश्वरस्थित कार्यालयको समाचार कक्षबाटै नियन्त्रणमा लिएको छ। त्यस्तै, मोटिभेट न्युजका पत्रकार शोभराज बराललाई पनि प्रहरीले नियन्त्रणमा लिएको छ।

यसैगरी, शुक्रबार नै नयाँ पत्रिका दैनिक र दियोपोस्ट अनलाइनको कार्यालयमा समेत प्रहरी पुगेको थियो। विभिन्न सञ्चारमाध्यमका कार्यालयमा प्रहरी पुगेपछि पत्रकारिता क्षेत्रबाट विरोध सुरु भएको छ।

यसैबीच, महासंघका उपाध्यक्ष दीपक आचार्यले समाचार लेखेकै आधारमा पत्रकारमाथि भइरहेको प्रहरी धरपकडप्रति आपत्ति जनाएका छन्।

उनले समाचारको विषयलाई लिएर पत्रकार पक्राउ गर्ने, सञ्चारमाध्यमका कार्यालयमा प्रहरी पठाउने र पत्रकारको खोजी गर्ने कार्यले प्रेस तथा अभिव्यक्ति स्वतन्त्रतालाई कमजोर बनाउने बताएका छन्।

आचार्यले भने, “समाचार लेखेकै आधारमा सरकारले यसरी अनावश्यक खालको धरपकड गर्ने, आतंक सिर्जना गर्ने र प्रेस तथा अभिव्यक्ति स्वतन्त्रतालाई कमजोर बनाउने एवं संकुचन गर्ने कार्य गरेको छ। भयरहित वातावरणमा काम गर्न नदिने यो कदम घोर निन्दनीय र आपत्तिजनक छ।”

समाचार गलत भए त्यसको कानुनी उपचार खोज्ने व्यवस्था हुँदाहुँदै पत्रकारलाई प्रहरीमार्फत साइबर ब्युरो पुर्‍याउनु कानुनी राज्यको उपहास भएको उनको भनाइ छ।

समाचारको विषयमा चित्त नबुझे सम्बन्धित निकायमा कानुनी प्रक्रिया अघि बढाउन सकिने विकल्प हुँदाहुँदै पत्रकारलाई पक्राउ गरेर त्रास सिर्जना गर्नु उचित नभएको आचार्यले बताएका छन्।

महासंघले समाचार कक्षमा प्रहरी प्रवेश गरी पत्रकारलाई नियन्त्रणमा लिने कार्य तत्काल रोक्न र सञ्चारकर्मीलाई भयरहित वातावरणमा काम गर्ने सुनिश्चितता गर्न सरकारसँग आग्रह गरेको छ। माग सम्बोधन नभए आन्दोलनमा उत्रिने चेतावनीसमेत महासंघले दिएको छ।