सेतो खबर
काठमाडौं । राष्ट्रिय स्वतन्त्र पार्टी (रास्वपा)की नेतृ तथा चितवन क्षेत्र नम्बर ३ की प्रतिनिधि सभा उम्मेदवार सोविता गौतम आदिवासी जनजाति समुदायप्रति दिएको भनिएको अभिव्यक्तिका कारण विवादमा तानिएकी छन्।
चुनावी कार्यक्रमलाई सम्बोधन गर्ने क्रममा उनले ‘आदिवासी जनजाति पैसामा बिक्ने’ भन्ने आशयको टिप्पणी गरेको आरोप लगाउँदै नेपाल आदिवासी जनजाति महासंघ, जिल्ला परिषद् सचिवालय चितवनले कडा आपत्ति जनाएको हो।
महासंघद्वारा जारी विज्ञप्तिमा भनिएको छ, ‘आफ्नो सम्बोधनका क्रममा उम्मेदवार गौतमले यस क्षेत्रका वीर, इमानदार र सचेत आदिवासी समुदायलाई ‘पैसाले किन्न सकिने’ र ‘बिक्न सक्ने वर्ग’ भनी जुन निकृष्ट टिप्पणी गर्नुभएको छ, त्यसले वर्षौंदेखि आफ्नो पहिचान, स्वाभिमान र अधिकारका लागि संघर्षरत आदिवासी जनजाति समुदायको मानमर्दन मात्र गरेको छैन, हाम्रो राजनीतिक चेतना र विवेकमाथि समेत गम्भीर प्रहार गरेको छ।’
महासंघले यस्तो अभिव्यक्तिले समुदायको आत्मसम्मानमा चोट पुगेको दाबी गर्दै तत्काल सार्वजनिक रूपमा माफी माग्न माग गरेको छ। यदि माफी नआए कडा कदम चालिने चेतावनी समेत दिइएको छ।
विज्ञप्तिमा उल्लेख छ, ‘नेपाल आदिवासी जनजाति महासंघ चितवन क्षेत्र नम्बर ३ का सम्पूर्ण संयन्त्रहरू परिचालन गरी उक्त उम्मेदवारलाई ‘चुनावी बहिष्कार’ गर्ने र सशक्त आन्दोलनका कार्यक्रमहरू अगाडि बढाउने चेतावनी दिन चाहन्छ।’
यस घटनापछि चितवन–३ को चुनावी माहोल तातेको छ। विभिन्न राजनीतिक दल र सामाजिक संघसंस्थाले पनि घटनाबारे चासो व्यक्त गर्न थालेका छन्।
उता, सोविता गौतम वा राष्ट्रिय स्वतन्त्र पार्टीको तर्फबाट यस विषयमा औपचारिक प्रतिक्रिया आउन बाँकी रहेको बताइएको छ। चुनाव नजिकिँदै गर्दा यो विवादले स्थानीय राजनीतिक समीकरणमा असर पार्ने आकलन गरिएको छ।
काठमाडौं । इरान र इजरायलबीच चर्किएको युद्ध (जसमा अमेरिका समेत संलग्न छ) ले नेपालजस्तो आयात र रेमिट्यान्समा निर्भर अर्थतन्त्रलाई ‘दोहोरो खतरा’ तर्फ धकेल्ने संकेत... विस्तृतमा
