सेतो खबर
काठमाडौं । भोलि तीजका दिन पशुपतिनाथ मन्दिरका चारै वटा ढोका बिहान ३ बजेदेखि नै खुला गरिने भएको छ।
पशुपति क्षेत्र विकास कोषले आइतबार पत्रकार सम्मेलन गर्दै तीजका अवसरमा व्रतालु तथा दर्शनार्थीलाई सहज, व्यवस्थित र सुरक्षित रूपमा दर्शन गराउन आवश्यक सम्पूर्ण तयारी पूरा गरिएको जनाएको हो।
कोषका अनुसार यस वर्ष पनि विगतमा जस्तै कुनै पनि प्रकारको विशेष पूजा तथा विशेष दर्शन पास को व्यवस्था गरिएको छैन।
दर्शनार्थीलाई छिटो र सहज रूपमा दर्शन गराउन मन्दिरका उत्तर, पूर्व र दक्षिणतर्फका ढोकामा पारदर्शी जाली राखिनेछ। मन्दिर परिसरबाहिर पाँचवटा र भित्र आठवटा लाइनको व्यवस्था गरिनेछ। ती लाइनबाट एकपटकमा आठ जनाले सहज रूपमा दर्शन गर्न सक्ने व्यवस्था मिलाइएको कोषले जनाएको छ।
भीड व्यवस्थापनका लागि विभिन्न दिशाबाट आउने भक्तजनका लागि छुट्टाछुट्टै चारवटा दर्शन मार्ग निर्धारण गरिएको छ। मित्रपार्क–उमाकुण्ड, गौशाला–जयबागेश्वरी, सिनामंगल–तिलगंगा र पिंगलास्थानतर्फबाट आउने दर्शनार्थीलाई विभिन्न अस्थायी आकाशे पुल तथा र्याम्पमार्फत मन्दिर परिसर प्रवेश गराइनेछ।
पर्वलाई शान्तिपूर्ण र सुरक्षित रूपमा सम्पन्न गर्न नेपाल प्रहरी, सशस्त्र प्रहरी बल र काठमाडौं महानगरपालिकाको नगर प्रहरीले संयुक्त सुरक्षा योजना लागू गर्नेछन्। पाकेटमारी तथा अन्य अवाञ्छित गतिविधि नियन्त्रणका लागि सादा पोसाकमा समेत प्रहरी टोली परिचालन गरिनेछ।
तीज महिलाहरूको विशेष पर्व भएकाले मन्दिरको निश्चित कोर क्षेत्रमा पुरुष प्रवेशमा रोक लगाइने भएको छ। नियमित रूपमा दर्शन गर्ने पुरुष दर्शनार्थीले भने बिहान ५ः३० बजेभित्रै दर्शन गरिसक्नुपर्ने कोषले जनाएको छ।
त्यस्तै, पशुपति क्षेत्रभित्र मांस, मदिरा तथा अन्य नशाजन्य पदार्थको बिक्री–वितरण र सेवनमा पूर्ण प्रतिबन्ध लगाइनेछ। स्थानीय बासिन्दाका लागि भने सम्बन्धित वडाबाट जारी पासका आधारमा आवतजावतको व्यवस्था मिलाइने कोषले जनाएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
