सेतो खबर
काठमाडौं । सरकारले जेन–जी आन्दोलनका सहिद परिवार र घाइतेलाई स्वरोजगार प्रयोजनका लागि सवारीसाधन खरिद गर्दा शतप्रतिशत कर छुट दिने निर्णय गरेको छ।
अर्थ मन्त्रालयले राजपत्रमा सूचना प्रकाशित गर्दै सरकारबाट स्वीकृत एकीकृत प्याकेजअन्तर्गत सहिद परिवार र घाइतेलाई उक्त सुविधा उपलब्ध गराउने जानकारी दिएको हो।
नयाँ व्यवस्थाअनुसार स्वरोजगारका लागि १५ लाख रुपैयाँसम्म मूल्य पर्ने पेट्रोल वा डिजेलबाट चल्ने गाडी** खरिद गर्दा लाग्ने करमा पूर्ण छुट दिइनेछ। त्यस्तै, २० लाख रुपैयाँसम्म कारोबार मूल्य भएका विद्युतीय गाडी खरिद गर्दा लाग्ने करमा समेत शतप्रतिशत छुट उपलब्ध हुनेछ।
सरकारले जेन–जी आन्दोलनका क्रममा ज्यान गुमाएका व्यक्तिका परिवार तथा घाइतेलाई आर्थिक रूपमा सहयोग गर्ने र उनीहरूलाई स्वरोजगारमा जोड्ने उद्देश्यले यस्तो सुविधा ल्याएको हो।
सबै प्रकारका गाडीमा छुट नहुने
अर्थ मन्त्रालयका अनुसार यो कर छुट सबै प्रकारका सवारीसाधनमा लागू हुने छैन। हिउँमा यात्रा गर्न बनाइएका विशेष प्रकारका गाडी, गल्फ कार तथा त्यस्तै प्रकृतिका सवारीसाधनमा छुट सुविधा उपलब्ध हुने छैन।
त्यस्तै, भन्सार शीर्षक ८७.०३ अन्तर्गत पर्ने स्टेसन वागन, रेसिङ कार तथा विभिन्न उपशीर्षकमा पर्ने **अनएसेम्बल्ड अवस्थामा रहेका सवारीसाधन** खरिद गर्दा पनि यो सुविधा नपाइने मन्त्रालयले स्पष्ट पारेको छ।
चालु आर्थिक वर्षमा मात्रै सुविधा
सरकारले उपलब्ध गराएको यो कर छुट सुविधा चालु आर्थिक वर्षका लागि मात्र मान्य हुने अर्थ मन्त्रालयले जनाएको छ।
अर्थ मन्त्रालयले राजपत्रमा सूचना प्रकाशित गरेसँगै जेन–जी आन्दोलनका सहिद परिवार र घाइतेले तोकिएका मापदण्ड पूरा गरी स्वरोजगार प्रयोजनका लागि सवारीसाधन खरिद गर्दा कर छुट पाउने बाटो खुलेको छ।
सरकारले स्वीकृत गरेको एकीकृत प्याकेजअनुसार प्रदान गरिने यस सुविधाले आन्दोलनबाट प्रभावित परिवार तथा घाइतेलाई स्वरोजगारका माध्यमबाट आर्थिक रूपमा आत्मनिर्भर बनाउन सहयोग पुग्ने अपेक्षा गरिएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
