मन्त्री र सांसदहरुलाई रमिता नदेखाउन सभापति रवि लामिछानेको निर्देशन

सत्तारुढ राष्ट्रिय स्वतन्त्र पार्टी (रास्वपा)का सभापति रवि लामिछानेले पार्टीका मन्त्री र सांसदलाई संसद् तथा सार्वजनिक गतिविधिमा मर्यादित र जिम्मेवार बन्न निर्देशन दिएका छन्।

संसदीय दलको बैठकपछि सञ्चारकर्मीसँग कुरा गर्दै लामिछानेले तत्काल मन्त्री हेरफेर गर्ने कुनै तयारी नरहेको स्पष्ट पारे। मन्त्री तथा मन्त्रालयका कामकारबाहीमा प्रश्न उठ्नु स्वाभाविक भएको भन्दै त्यसलाई अस्वाभाविक रूपमा लिन नहुने उनको भनाइ थियो।

‘कुनै पनि मन्त्रालय, मन्त्री वा उहाँहरूले १०० वटा काम गर्दा १÷२ वटा वा ४÷५ वटा काममा प्रश्न आउनु स्वाभाविक हो। रास्वपाभित्र हामी आफैँ पनि प्रश्न गर्ने गर्छौं,’ उनले भने, ‘मन्त्री फेर्ने कुनै तयारी छैन, कुनै छलफल छैन र त्यस्तो कुनै सम्भावना पनि छैन।’

लामिछानेले बुधबारको छलफललाई औपचारिक संसदीय दलको बैठक नभई सभापतिले सांसदहरूसँग गरेको आन्तरिक छलफल भएको बताए। औपचारिक दलको बैठक भने पछि बस्ने उनले जानकारी दिए।

बैठकमा संसद्मा पार्टीका सांसद र मन्त्रीहरूको भूमिकाबारे छलफल भएको थियो। संसद्मा मर्यादित ढंगले प्रस्तुत हुने र जनतासँग प्रत्यक्ष जोडिएका विषयलाई प्राथमिकताका साथ उठाउने विषयमा छलफल भएको लामिछानेले बताए।

सांसद र मन्त्रीलाई गतिविधि पारदर्शी बनाउन निर्देशन

बैठकका क्रममा लामिछानेले कतिपय सांसदले संसद्मा बोल्ने विषयबारे संसदीय दललाई जानकारी नगराउने गरेको तथा मन्त्रीहरूले समेत संसद् र बाहिरका गतिविधिबारे पार्टीलाई जानकारी नदिने गरेको भन्दै असन्तुष्टि जनाए।

उनले सांसद र मन्त्री दुवैलाई आफ्ना गतिविधि पारदर्शी बनाउन तथा पार्टीसँग समन्वय गरेर अघि बढ्न निर्देशन दिए।

‘कतिपय सांसदहरूले प्रतिनिधिसभामा बोल्दा संसदीय दललाई नै जानकारी नगराएको भेटिएको छ। मन्त्रीहरूले समेत सदन र बाहिरका गतिविधिबारे पार्टीलाई जानकारी गराउने गरेका छैनन्,’ उनले भने, ‘सांसद र मन्त्री दुवैले यस्ता गतिविधि सच्याउनुपर्छ।’

लामिछानेले मन्त्री तथा सांसदलाई घमण्ड त्यागेर आपसी सहकार्य र संवादका माध्यमबाट काम गर्नसमेत आग्रह गरे। आफूले सबैको गतिविधि नजिकबाट नियालिरहेको भन्दै उनले कमजोरी सुधार्न निर्देशन दिए।

‘आरएसपी पल्स’ एपमा गतिविधि अपडेट गर्न निर्देशन

रास्वपाले सार्वजनिक गरेको ‘आरएसपी पल्स’ एपमार्फत सांसद तथा मन्त्रीका गतिविधिको विवरण अद्यावधिक गर्न पनि लामिछानेले निर्देशन दिएका छन्।

उनले संसद्मा बोल्ने विषय, भ्रमण, भेटघाटलगायत गतिविधि एपमा नियमित रूपमा अपडेट गर्न भने। यसले पार्टीभित्र सांसद तथा मन्त्रीका गतिविधिबारे जानकारी र समन्वय कायम गर्न सहयोग पुग्ने उनको भनाइ थियो।

पोसाकमा समेत मर्यादा कायम गर्न आग्रह

लामिछानेले सांसद तथा मन्त्रीलाई पोसाक र व्यवहारमा समेत संसदीय मर्यादा कायम गर्न निर्देशन दिएका छन्। संसद् जनप्रतिनिधिहरूको सर्वोच्च औपचारिक थलो भएकाले सबैले आफ्नो प्रस्तुति र व्यवहारमा ध्यान दिनुपर्ने उनको भनाइ थियो।

प्रधानमन्त्री बालेन्द्र शाहसमेत संसद्मा टी–सर्टमा उपस्थित हुने गरेको सन्दर्भमा उनले सबैले संसदीय मर्यादालाई ध्यान दिनुपर्ने बताएका हुन्।

लामिछानेले सांसद तथा मन्त्रीहरूलाई अमर्यादित गतिविधि गरेर ‘रमिता नदेखाउन’ र जिम्मेवार ढंगले प्रस्तुत हुन स्पष्ट निर्देशन दिएका छन्।