एनएमबि बैंकको नेतृत्वमा ४४० मेगावाटको तिला–१ जलविद्युत आयोजनाको वित्तीय व्यवस्थापन

काठमाडौं । एनएमबि बैंक लिमिटेडको अगुवा लगानीमा कालीकोटमा निर्माण हुन लागेको ४४० मेगावाट क्षमताको तिला–१ जलविद्युत आयोजनाको वित्तीय व्यवस्थापन सम्पन्न भएको छ।

एससी पावर कम्पनी प्रालिले तिला खोलामा निर्माण गर्न लागेको आयोजनाको कुल अनुमानित लागत ५९ अर्ब ४० करोड रुपैयाँ रहेको छ। जसमध्ये बैंक तथा वित्तीय संस्थाहरूको ऋण लगानी ४४ अर्ब ५५ करोड रुपैयाँ रहनेछ।

वित्तीय व्यवस्थापनमा एनएमबि बैंक अगुवा बैंकका रूपमा रहेको छ भने ग्लोबल आइएमई बैंक, हिमालयन बैंक र प्रभु बैंक सह–अगुवा बैंकका रूपमा रहेका छन्। अन्य बैंक तथा वित्तीय संस्थाहरू पनि सहभागी लगानीकर्ताका रूपमा रहनेछन्।

सम्झौतामा एनएमबि बैंकका सहायक महाप्रबन्धक दिनेश दुलाल र एससी पावर कम्पनीका अध्यक्ष सुसन कर्माचार्यले हस्ताक्षर गरेका छन्।

आयोजनाको उत्पादन अनुमतिपत्रअनुसार क्षमता ४४० मेगावाट रहेको छ। विद्युत खरिद सम्झौता (पीपीए) अनुसार आयोजनाले २०८७ पुस १५ गते अर्थात् ३१ डिसेम्बर २०३० देखि व्यावसायिक उत्पादन सुरु गर्नुपर्नेछ।

निजी क्षेत्रको लगानी र नेतृत्वमा अघि बढाइएको यो आयोजना जडित क्षमताका आधारमा अहिलेसम्मकै ठूलो आयोजना भएको बताइएको छ। आयोजना निर्माण सम्पन्न भएपछि पहिलो वर्ष करिब ११ अर्ब ४० करोड रुपैयाँ आम्दानी हुने अनुमान गरिएको छ।

एनएमबि बैंकले वातावरणीय तथा सामाजिक जोखिम व्यवस्थापनसम्बन्धी मापदण्ड पालना गर्दै आयोजनाको वातावरणीय, सामाजिक तथा सुशासन पक्षको मूल्याङ्कनपछि लगानी गरेको जनाएको छ।

बैंकका अनुसार एनएमबिले हालसम्म ५० भन्दा बढी जलविद्युत आयोजनामा लगानी गरिसकेको छ। बैंकले देशभर १९७ शाखा, १७६ एटिएम र ९ एक्सटेन्सन काउन्टरमार्फत बैंकिङ सेवा प्रदान गर्दै आएको छ।