सेतो खबर
रूपन्देही । रुकुम पूर्वको भूमे गाउँपालिका–९ चुनबाङस्थित दोमै खोलाको भत्किएको पुल देखाउँदै १५ वर्षीया सदीक्षा ओलीले पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई सम्बोधन गर्दै बनाएको भिडियो सामाजिक सञ्जालमा भाइरल बनेको छ ।
आइतबार साँझ करिब ८ बजे फेसबुकमा पोस्ट गरिएको भिडियोमा सदीक्षाले प्रचण्डलाई सम्बोधन गर्दै आफ्नो गाउँको पुलको अवस्था देखाएकी छन् । उनले चुनाव जितेर गएपछि गाउँको समस्या बेवास्ता गरेको भन्दै पुल मर्मत वा पुनर्निर्माणका लागि पहल गर्न आग्रह गरेकी छन् ।
‘हेलो ! प्रचण्ड बाजे, कता हुनुहुन्छ ? हाम्रो यहाँ पूर्व रुकुमबाट चुनाव जितेर मात्रै जानुभो, यहाँ पुलको हाल हेर्नुस् यस्तो छ,’ उनले भिडियोमा भनेकी छन् ।
उनले पुल भाँचिएपछि स्थानीयवासी खोलाबाटै आवतजावत गर्न बाध्य भएको र यसबाट मानिस तथा चौपायालाई जोखिम रहेको बताएकी छन् । विशेषगरी विद्यालय जाने बालबालिकाका लागि जोखिम बढेको भन्दै उनले कुनै अप्रिय घटना हुनुअघि नै पुल निर्माण गर्न माग गरेकी छन् ।
सदीक्षाका अनुसार उनको गाउँनजिकै रहेको दोमै खोलाको पुल दुई महिनाअघि भत्किएको हो । लामो समय बितिसक्दा पनि पुल मर्मत हुन नसकेपछि सम्बन्धित निकायको ध्यानाकर्षण गराउन उनले भिडियो बनाएकी हुन् ।
भूमे गाउँपालिका–९ की सदीक्षा गाउँबाट करिब एक घण्टाको दूरीमा रहेको गैरीगाउँस्थित नेपाल राष्ट्रिय माध्यमिक विद्यालयमा कक्षा १० मा अध्ययनरत छिन् । बर्खायाममा खोलामा पानीको बहाव बढ्ने भएकाले पुल नहुँदा आवतजावत झनै जोखिमपूर्ण हुने गरेको उनको भनाइ छ ।
उनको भिडियोमा प्रतिक्रिया र कमेन्ट गर्नेको संख्या उल्लेख्य छ । सामाजिक सञ्जाल प्रयोगकर्ताले १५ वर्षीया किशोरीले स्थानीय समस्यालाई सार्वजनिक रूपमा उठाएको भन्दै प्रशंसा गरेका छन् ।
निर्वाचनका बेला जनताको मत माग्ने तर निर्वाचित भएपछि स्थानीय समस्यामा पर्याप्त ध्यान नदिने प्रवृत्तिमाथि समेत सदीक्षाको भिडियोले प्रश्न उठाएको छ । भत्किएको पुलका कारण विद्यार्थी तथा स्थानीयवासी जोखिमपूर्ण यात्रा गर्न बाध्य भइरहेका बेला उनको आवाजले सम्बन्धित निकायलाई तत्काल पुल मर्मत वा पुनर्निर्माण गर्न दबाब सिर्जना गरेको छ ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
