सेतो खबर
काठमाडौं । प्रधानमन्त्री वालेन्द्र शाह (बालेन) ले निजी शिक्षा र स्वास्थ्य क्षेत्रमा लागू गर्ने घोषणा गरिएको **३ प्रतिशत ‘समता कर’ तत्कालका लागि कार्यान्वयन नगर्ने** घोषणा गरेका छन्। आम नागरिकबाट आएको सुझाव, असन्तुष्टि तथा थप आर्थिक भार पर्ने चिन्तालाई ध्यानमा राख्दै सरकार पछि हटेको हो।
मंगलबार सामाजिक सञ्जाल फेसबुकमार्फत प्रधानमन्त्री शाहले अर्थमन्त्री डा. स्वर्णिम वाग्लेसँगको परामर्शपछि हालका लागि शिक्षा समता शुल्क र स्वास्थ्य समता शुल्क लागू नगर्ने निर्णय गरिएको जानकारी दिएका छन्। उनले सरकार जनताको भावना र सुझावप्रति संवेदनशील रहेको उल्लेख गर्दै आवश्यक परे नीतिगत निर्णयमा पनि परिमार्जन गर्न तयार रहने बताएका छन्।
सरकारले दुर्गम तथा पछाडि परेका नागरिकलाई गुणस्तरीय शिक्षा र स्वास्थ्य सेवामा सहज पहुँच दिलाउने उद्देश्यले निजी शिक्षा र स्वास्थ्य क्षेत्रमा ३ प्रतिशत ‘समता कर’ लगाउने योजना अघि सारेको थियो। तर उक्त निर्णय सार्वजनिक भएलगत्तै निजी क्षेत्र, अभिभावक, विद्यार्थी, स्वास्थ्यकर्मी तथा सर्वसाधारणबाट यसले सेवा महँगो बनाउने र थप आर्थिक भार पर्ने भन्दै व्यापक आलोचना भएको थियो।
यही प्रतिक्रिया र जनचासोलाई मध्यनजर गर्दै सरकारले तत्कालका लागि उक्त कर कार्यान्वयन नगर्ने निर्णय गरेको प्रधानमन्त्री शाहले स्पष्ट पारेका छन्। उनका अनुसार सरकारले नागरिकको हितलाई केन्द्रमा राखेर नीति निर्माण गर्ने भएकाले जनताबाट आएका सुझावलाई उच्च प्राथमिकताका साथ लिइएको हो।
यद्यपि, **विपन्न र आर्थिक रूपमा कमजोर नागरिकलाई गुणस्तरीय शिक्षा तथा स्वास्थ्य सेवा उपलब्ध गराउने सरकारको प्रतिबद्धता भने यथावत् रहने** प्रधानमन्त्री शाहले बताएका छन्। त्यसका लागि निजी अस्पतालमा **१० प्रतिशत बेड** तथा निजी क्याम्पस र विश्वविद्यालयमा १० प्रतिशत सिट विपन्न तथा आवश्यकतामा रहेका नागरिकका लागि पारदर्शी र न्यायोचित रूपमा उपलब्ध गराउने नीति कडाइका साथ कार्यान्वयन गरिने उनले उल्लेख गरेका छन्।
प्रधानमन्त्री शाहले सामाजिक न्याय र समान पहुँच सुनिश्चित गर्ने सरकारको उद्देश्यमा कुनै परिवर्तन नभएको स्पष्ट पार्दै जनताको विश्वासअनुसार काम गर्ने प्रतिबद्धता पनि व्यक्त गरेका छन्। सरकारका निर्णयले नागरिकमा अनावश्यक आर्थिक भार पर्न नदिन र आवश्यक परे नीतिगत सुधार गर्न सरकार सधैं तयार रहने उनको भनाइ छ।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
