नाइमा अटो शोमा नीति संवाददेखि ब्याट्री रिसाइक्लिङसम्म विशेष छलफल हुने : ऋतु सिंह वैद्य

काठमाडौं । नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन (नाइमा)ले साउन २६ देखि ३१ (अगस्ट ११ देखि १६) सम्म काठमाडौंको भृकुटीमण्डपमा आयोजना हुने नाइमा अटो शो–२०२६ को तयारी तीव्र गतिमा अघि बढाएको जनाएको छ ।

नेपाल न्यूज बैंकसँगको कुराकानीमा नाइमाकी अध्यक्ष ऋतु सिंह वैद्यले यस वर्षको अटो शोमा ५५ वटा अटोमोबाइल ब्रान्ड र ५२ वटा स्टल रहने जानकारी दिँदै तयारीका लागि कार्यालयमा अतिरिक्त जनशक्ति परिचालन गरिएको बताइन् ।

उनले नाइमा अटो शोलाई केवल सवारीसाधन बिक्री गर्ने मञ्चका रूपमा नभई नीति निर्माण, पूर्वाधार विकास र अटोमोबाइल उद्योगसँग सम्बन्धित विषयमा बहस गर्ने साझा प्लेटफर्मका रूपमा विकास गरिएको बताइन् ।

उनका अनुसार अटो शोको प्रमुख आकर्षण ‘लर्निङ सेसन’ हुनेछ, जहाँ प्रत्यक्ष वैदेशिक लगानी (एफडीआई), यातायात पूर्वाधार, ट्राफिक व्यवस्थापन, ब्याट्री रिसाइक्लिङ, इथानोल ब्लेन्डिङ, वित्तीय नीति लगायत विषयमा स्वदेशी तथा विदेशी विज्ञले प्रस्तुति दिनेछन् ।

वैद्यका अनुसार भारतबाट ब्याट्री रिसाइक्लिङ र इथानोल मिश्रणसम्बन्धी विशेषज्ञलाई समेत आमन्त्रण गरिएको छ । नेपालमा विद्युतीय सवारीको संख्या तीव्र रूपमा बढे पनि ब्याट्री रिसाइक्लिङ प्लान्ट नहुँदा यस विषयमा तत्काल नीति र पूर्वाधार आवश्यक रहेको उनको भनाइ छ ।

अटो शोलाई यस वर्ष अझ व्यवस्थित बनाउन अपाङ्गमैत्री संरचना, वर्षाबाट सुरक्षित व्यवस्था, स्तरीय रेस्टुरेन्ट तथा पर्याप्त पार्किङको व्यवस्था गरिएको उनले जानकारी दिइन् । पार्किङ नेपाल पुलिस क्लबमा रहनेछ भने लर्निङ सेसन पनि त्यहीँ आयोजना हुनेछ ।

वैद्यले दसैं–तिहारअघि हुने अटो शोले सवारी बिक्री बढाउने अपेक्षा गरिएको बताउँदै नाइमाको भूमिका व्यापारमा मात्र सीमित नरहेको स्पष्ट पारिन् । उनका अनुसार संस्थाले ट्राफिक प्रहरीसँग समन्वय गरी हालसम्म करिब १,६०० जनालाई विद्युतीय तथा हाइब्रिड सवारी सञ्चालनसम्बन्धी तालिम प्रदान गरिसकेको छ ।

साथै यातायात व्यवस्था विभाग, नेपाल प्रहरी तथा विभिन्न सरकारी निकायसँग सहकार्य गर्दै पूर्वाधार सुधार र सेवा प्रवाहमा पनि योगदान दिँदै आएको उनले बताइन् ।

सरकारी नीतिका सम्बन्धमा बोल्दै उनले विद्युतीय सवारीमा कर निर्धारण गर्दा ‘पिक पावर’लाई आधार बनाउने व्यवस्था व्यवहारिक नभएको टिप्पणी गरिन् । पिक पावर गाडीको टर्क तथा प्राविधिक सेटिङअनुसार परिवर्तन गर्न सकिने भएकाले यस आधारमा करको वर्गीकरण गर्दा मूल्य र करमा अन्योल सिर्जना हुने उनको भनाइ छ ।

विशेषगरी करको एउटा स्ल्याबबाट अर्को स्ल्याबमा पुग्ने अवस्थामा सानो मूल्य परिवर्तनले ठूलो करभार बढ्न सक्ने भएकाले त्यसमा पुनर्विचार आवश्यक रहेको उनले बताइन् ।

ट्राफिक व्यवस्थापनबारे उनले सडकमा लेन मार्किङ, पार्किङ क्षेत्र तथा आवश्यक पूर्वाधार नबनाई जरिवाना बढाउनु उचित नहुने धारणा राखिन् ।

सिटबेल्ट नलगाउने, मादक पदार्थ सेवन गरेर सवारी चलाउनेजस्ता स्पष्ट उल्लङ्घनमा कडाइ गर्नुपर्ने तर पूर्वाधार अभावका कारण हुने समस्यामा सुधारलाई प्राथमिकता दिनुपर्ने उनको सुझाव थियो ।

वैद्यले नाइमाको सदस्य बन्नका लागि न्यूनतम पुँजी, निश्चित अवधिको व्यवसाय सञ्चालन तथा सम्बन्धित उत्पादक कम्पनीबाट आधिकारिक मान्यता प्राप्त गरेको हुनुपर्ने व्यवस्था रहेको जानकारी दिँदै यसले ग्राहकको हित र विश्वासलाई सुरक्षित बनाएको बताइन् ।

आगामी वर्षदेखि यात्रुवाहक र व्यावसायिक सवारीको प्रदर्शनी छुट्टाछुट्टै आयोजना गर्ने तयारी भइरहेको पनि उनले जानकारी दिइन् । यससँगै अटोमोबाइल उद्योगका नीति, लगानी र प्रविधिसम्बन्धी विषयमा छुट्टै ‘अटोमोटिभ कन्क्लेभ’ आयोजना गर्ने योजना रहेको उनले सुनाइन् ।

अर्थतन्त्रमा देखिएको सुस्तताप्रति चिन्ता व्यक्त गर्दै वैद्यले नयाँ सरकारले केही समय आधारभूत व्यवस्था मिलाउनुपर्ने भएकाले उद्योगी–व्यवसायीले केही धैर्यता राख्नुपर्ने धारणा राखिन् । यद्यपि आगामी ६ देखि ८ महिनाभित्र सकारात्मक नीतिगत सुधार देखिनुपर्ने अपेक्षा उनले व्यक्त गरिन् ।

उनले सर्वसाधारणलाई परिवारसहित अटो शोमा सहभागी हुन आग्रह गर्दै ५५ ब्रान्डका नयाँ सवारी, चार्जिङ समाधान, लर्निङ सेसन तथा अन्य आकर्षणको अवलोकन गर्न निमन्त्रणा दिइन् । उनका अनुसार सबै लर्निङ सेसन निःशुल्क हुनेछन् र सहभागीले आफ्ना सुझाव तथा धारणा पनि राख्न सक्ने व्यवस्था गरिएको छ ।