माविमा एकै शिक्षकले दुई विषय पढाउनु पर्ने व्यवस्था गरिँदै

काठमाडौं । माध्यमिक तहमा तीव्र रूपमा देखिएको शिक्षक अभावको समस्या समाधान गर्न सरकार नीतिगत रूपमै एक शिक्षकले दुई विषय पढाउन सक्ने व्यवस्था गर्न लागिपरेको छ।

शिक्षा, विज्ञान तथा प्रविधि मन्त्रालय र विश्वविद्यालय अनुदान आयोग (UGC) बीच भएको छलफलमा क्याम्पसस्तरमै विद्यार्थीलाई विषय छनोटमा लचिलोपन दिन सकिने र त्यसअनुसार शिक्षण स्रोत व्यवस्थापन गर्न सकिने विषयमा सहमति जुटाइएको छ।

मन्त्रालयका प्रवक्ता शिवकुमार सापकोटाका अनुसार आगामी आर्थिक वर्षको बजेटमै आवश्यक व्यवस्था गरेर यो नीति कार्यान्वयनमा लैजाने तयारी भइरहेको छ। “कसै–कसै विद्यालयमा विद्यार्थीको संख्या थोरै हुँदाहुँदै पनि विषयगत शिक्षक राख्नुपर्ने बाध्यता छ,” सापकोटाले भने, “त्यसैले एक शिक्षकलाई दुई विषय अध्यापनको अवसर दिइने व्यवस्था गरिँदैछ।”

शिक्षकको अपवितरण र कार्यभारको असमानता समाधान गर्न यो नीति प्रभावकारी हुने विश्वास गरिएको छ। हाल कतिपय शिक्षकले कक्षा ९ र १० मा दुई पिरियड मात्रै पढाएर पनि पूर्ण तलब पाइरहेका उदाहरणहरू रहेको शिक्षा मन्त्रालयले जनाएको छ।

यसैबीच, माथिल्लो तहमा नियुक्त शिक्षकलाई तल्लो तहमा पठाउन सकिने गरी कानुनी तथा संरचनात्मक सुधारको प्रस्ताव पनि तयारी अवस्थामा रहेको जनाइएको छ।

सरकारको यो निर्णयले ग्रामीण तथा सुदूरवर्ती विद्यालयहरूमा देखिएको विषयगत शिक्षक अभावको समस्या समाधान गर्न मद्दत पुग्ने अपेक्षा गरिएको छ।