नेशनल लाइफले दियो उत्कृष्ट अभिकर्तालाई सम्मानसँगै सम्पत्ति शुद्धीकरण, एआई र डिजिटल मार्केटिङ प्रशिक्षण

भैरहवा । नेशनल लाइफ इन्स्योरेन्स कम्पनी लिमिटेडले उत्कृष्ट अभिकर्ताहरूलाई सम्मान तथा चेयरपर्सन क्लब सदस्यता वितरण गर्नुका साथै सम्पत्ति शुद्धीकरण, कृत्रिम बुद्धिमत्ता (एआई) र डिजिटल मार्केटिङसम्बन्धी प्रशिक्षण प्रदान गरेको छ।

कम्पनीले आर्थिक वर्ष २०८२/८३ का लागि निर्धारित लक्ष्य पूरा गरी चेयरपर्सन क्लबमा छनोट भएका अभिकर्ताहरूको सम्मान तथा सदस्यता वितरणका लागि भैरहवास्थित होटल सिद्धार्थ भिलासामा वार्षिक चेयरपर्सन क्लब कार्यक्रम आयोजना गरेको हो। दुई रात तीन दिनसम्म चलेको कार्यक्रममा कम्पनीका विभागीय प्रमुख, प्रदेश प्रमुख, शाखा प्रमुख, मार्केटिङ कर्मचारीसहित ५६५ जनाको सहभागिता रहेको थियो।

भोटेकोशीमा आएको भीषण बाढी तथा त्यसबाट भएको जनधनको क्षतिप्रति दुःख व्यक्त गर्दै घाइते तथा बिरामीहरूको शीघ्र स्वास्थ्यलाभको कामना र ज्यान गुमाएकाहरूप्रति श्रद्धाञ्जली अर्पण गर्दै एक मिनेट मौनधारणबाट कार्यक्रमको सुरुवात गरिएको थियो।

कम्पनीकी चेयरपर्सन प्रेमाराज्य लक्ष्मी सिंहले पानसमा दीप प्रज्वलन गरी कार्यक्रमको औपचारिक उद्घाटन गरेकी थिइन्। उद्घाटन मन्तव्यमा उनले कम्पनीको मेरुदण्डका रूपमा रहेका अभिकर्ताहरूलाई थप व्यावसायिक र दक्ष बनाउन सीप तथा क्षमता विकासमा कम्पनीले निरन्तर सहयोग र सहकार्य गर्ने बताइन्।

अभिकर्ता सञ्जालमा नेतृत्व विकास महत्वपूर्ण रहेको उल्लेख गर्दै उनले त्यसका लागि कम्पनीले आवश्यक लगानी गर्ने प्रतिबद्धतासमेत व्यक्त गरिन्।

कम्पनीका प्रमुख कार्यकारी अधिकृत (सीईओ) सुरेश प्रसाद खत्रीले आर्थिक वर्ष २०८२/८३ मा कम्पनीले हासिल गरेको ऐतिहासिक व्यावसायिक उपलब्धि सम्पूर्ण नेशनल लाइफ परिवारको सामूहिक सफलता भएको बताए। नयाँ आर्थिक वर्षको सुरुवातसँगै कम्पनी स्पष्ट लक्ष्य, मापनयोग्य रणनीति र उच्च व्यावसायिक प्रतिबद्धताका साथ अघि बढिरहेको उनको भनाइ थियो।

उनले अभिकर्ता सञ्जाललाई थप मजबुत बनाउने र ग्राहक सेवाको गुणस्तर सुधार गर्न कम्पनीले विशेष प्राथमिकता दिएको बताए।

कार्यक्रममा चेयरपर्सन क्लब सदस्यता वितरण गर्नुका साथै आफ्नो कोड तथा सञ्जालको व्यवसायमा नेपालभर प्रथम, द्वितीय र तृतीय हुने तथा समूहगत व्यवसायमा प्रथम हुने अभिकर्ताहरूलाई सम्मान गरिएको थियो। त्यस्तै सेन्चुरियन क्लब, नेशनल स्टार, नेशनल सुपरस्टार तथा लगातार १० वर्षसम्म चेयरपर्सन क्लबमा छनोट हुन सफल अभिकर्ताहरूलाई पनि विशेष सम्मान प्रदान गरिएको थियो।

कार्यक्रममा आफ्नो कोड तथा सञ्जालमार्फत नेपालभर उत्कृष्ट व्यवसाय गर्ने विभिन्न अभिकर्ताहरूलाई चेयरपर्सन सिंहले सम्मान गरेकी थिइन्।

कार्यक्रमलाई केवल सम्मानमा सीमित नराखी सहभागी अभिकर्ताहरूको ज्ञान, सीप र क्षमता अभिवृद्धिका लागि विभिन्न विषयमा प्रशिक्षणसमेत सञ्चालन गरिएको थियो।

नेपाल बीमा प्राधिकरणका उपनिर्देशक पदमप्रसाद साडारीले सम्पत्ति शुद्धीकरणसम्बन्धी प्रशिक्षण दिएका थिए। उनले बीमालाई समेत माध्यम बनाएर सम्पत्ति शुद्धीकरण गर्ने गतिविधि हुन सक्ने भएकाले शंकास्पद गतिविधिको सूक्ष्म निगरानी, आवश्यक पहिचान तथा प्रचलित कानुनी व्यवस्थाको पालना गर्न बीमा व्यवसायमा संलग्न सबै पक्ष सचेत र सजग हुनुपर्ने बताए।

त्यस्तै प्रशिक्षक विश्वराज पौडेलले कृत्रिम बुद्धिमत्ता (एआई) सम्बन्धी प्रशिक्षण दिएका थिए। विभिन्न प्रयोगात्मक उदाहरण प्रस्तुत गर्दै उनले एआई प्रविधिलाई बीमा व्यवसायसँग कसरी जोड्न सकिन्छ भन्नेबारे जानकारी गराएका थिए। ग्राहकसँगको सम्पर्क, सामग्री निर्माण, व्यावसायिक योजना तथा सूचना व्यवस्थापनलगायतका क्षेत्रमा एआईको प्रभावकारी प्रयोग गर्न सकिने सम्भावनाबारे उनले प्रशिक्षण दिएका थिए।

अर्का प्रशिक्षक संजोग कोइरालाले डिजिटल मार्केटिङसम्बन्धी प्रशिक्षण दिएका थिए। अहिलेको समय डिजिटल युग भएकाले डिजिटल माध्यमलाई प्रभावकारी रूपमा प्रयोग गर्न सके बीमा व्यवसाय विस्तारमा महत्वपूर्ण लाभ लिन सकिने उनले बताए।

डिजिटल प्लेटफर्म प्रयोग गर्दा प्रचलित कानुन तथा नियामकीय व्यवस्थाको पूर्ण पालना गर्नुपर्नेमा जोड दिँदै उनले सत्यतथ्य सूचना र स्वीकृत सामग्री मात्र सार्वजनिक गर्न आग्रह गरे। भ्रामक समाचार, गलत सूचना वा गलत भाष्य सिर्जना गर्ने कार्यले कानुनी जटिलता निम्त्याउन सक्ने भएकाले यस विषयमा विशेष सजग हुनुपर्ने उनको भनाइ थियो।

चेयरपर्सन क्लबमा छनोट भएका अभिकर्ताहरूले वर्षभर निरन्तर मेहनत, अनुशासन र उत्कृष्ट व्यावसायिक प्रदर्शन आवश्यक पर्ने भएकाले कार्यक्रममा सहभागी भएर सम्मानित हुनु गौरवको विषय भएको बताए। वर्षभर गरेको मेहनतको परिणामस्वरूप प्राप्त सम्मानले आफ्नो परिश्रमले सार्थकता पाएको अनुभूति भएको उनीहरूको भनाइ थियो।

Available next action: Create a downloadable PDF file here in this chat containing the finalized decisions and immediate actions above