१८ दिनपछि कृष्णभिरबाट गाडी चल्न थाले

काठमाडौँ । बाढीले सडक बगाएपछि अवरुद्ध बनेको पृथ्वी राजमार्गको कृष्णभिर सडकखण्डमा अठार दिनपछि यातायात सेवा पुनःसञ्चालनमा आएको छ । बिहीबार बिहानदेखि कृष्णभिर हुँदै दुईतर्फी नै सवारीसाधन सञ्चालनमा आएका हुन् ।

गत भदौ १४ गते कृष्णभिरमा आएको बाढीले सडकको तल्लो भाग बगाएपछि पृथ्वी राजमार्ग पूर्ण रूपमा अवरुद्ध बनेको थियो । त्रिशूली नदीमा आएको बाढीले सडक कटान गरेपछि करिब १०० मिटर सडक क्षतिग्रस्त भएको थियो ।

सडक भासिएपछि गत भदौ १८ गतेदेखि नजिकै रहेको ढिस्को काटेर नयाँ ट्र्याक निर्माण सुरु गरिएको थियो । नागढुङ्गा–मुग्लिन सडक योजना (पश्चिम खण्ड)का इन्जिनियर धीरज ढकालका अनुसार बुधबार साँझसम्म नयाँ ट्र्याक निर्माणको काम सम्पन्न गरी बिहीबार बिहानदेखि सवारी सञ्चालनमा ल्याइएको हो ।

सडक पुनःसञ्चालनका लागि पूर्वाधार विकास मन्त्रालयले आवश्यक जनशक्ति, उपकरण तथा स्रोतसाधन परिचालन गरी नयाँ ट्र्याक निर्माण र सडक पुनःस्थापनाको काम अघि बढाएको थियो । सडक क्षतिग्रस्त भएको छोटो समयमै नयाँ ट्र्याक निर्माण सम्पन्न भएपछि यातायात सेवा सञ्चालनमा ल्याउन सम्भव भएको हो ।

दुई दिनअघिदेखि नै कृष्णभिर सडकमा रोकिएका केही सवारीसाधनलाई साँझको समयमा कटाइएको थियो । तर, बिहीबार बिहानदेखि भने सडकमा नियमित रूपमा दुईतर्फी यातायात सञ्चालन गरिएको हो ।

कृष्णभिरमा सवारी सञ्चालनमा आएसँगै नारायणगढ–मुग्लिन सडकखण्डको तुइन खोलामा आंशिक रूपमा रोकिएको यातायात सेवा पनि बिहीबारदेखि सञ्चालनमा ल्याइएको छ ।

चितवनका प्रमुख जिल्ला अधिकारी गणेश अर्यालले कृष्णभिरमा सवारी सञ्चालनमा आएसँगै तत्कालका लागि तुइन खोलामा आंशिक सडक रोकेर गरिएको पहिरो रोकथामको काम रोकिएको जानकारी दिएका छन् ।

लामो समयसम्म कृष्णभिर सडक अवरुद्ध हुँदा ठूला सवारीसाधनलाई संघीय राजधानी काठमाडौं आवतजावत गर्न समस्या भएको थियो । सडक अवरुद्ध हुँदा राजधानीमा खाना पकाउने एलपी ग्यासको आपूर्तिसमेत प्रभावित भएको थियो ।

गत भदौ १० गते भोटेकोसीमा आएको बाढीपछि त्रिशूली नदीमा पानीको बहाव बढेको थियो । भदौ १४ गते पुनः आएको बाढीले कृष्णभिरलगायत पृथ्वी राजमार्गका विभिन्न स्थानमा सडक भासिएको थियो ।

अन्य स्थानमा यातायात सञ्चालनमा आए पनि कृष्णभिरमा सडकको ठूलो भाग नै भासिएपछि समस्या भएको थियो । उक्त सडकखण्ड हुँदै दैनिक करिब १४ हजार सवारीसाधन आवतजावत गर्ने गरेको बताइएको छ ।

नयाँ ट्र्याक निर्माणसँगै पृथ्वी राजमार्गमा यातायात सेवा पुनःसञ्चालनमा आएपछि काठमाडौं उपत्यका र देशका विभिन्न भागबीचको आवागमन सहज हुने अपेक्षा गरिएको छ ।