जाजरकोटमा पहिरोमा परी मृत्यु हुनेको संख्या तीन पुग्यो, दुई अझै बेपत्ता

अविरल वर्षासँगै भेरी नगरपालिका–२ रिसाङमा आएको लेदोसहितको पहिरोमा परी मृत्यु हुनेको संख्या तीन पुगेको छ। पहिरोमा परी दुई जना अझै बेपत्ता छन् भने घाइतेको विभिन्न अस्पतालमा उपचार भइरहेको छ।

पहिरोमा परी घाइते भएका भेरी नगरपालिका–२ साल्धारा निवासी ५२ वर्षीय केदार कार्कीको उपचारका क्रममा मेडिकल कलेज कोहलपुरमा मृत्यु भएको जिल्ला अस्पताल जाजरकोटले जनाएको छ। उनलाई जिल्ला अस्पतालबाट थप उपचारका लागि नेपालगन्ज रिफर गरिएको थियो।

शनिबार साँझ करिब ५ः३० बजे आएको पहिरोमा परी सात जना घाइते भएका थिए। घाइतेमध्ये ६२ वर्षीय रामबहादुर शाही र ६१ वर्षीया भद्रकला कार्कीको अवस्था गम्भीर रहेकाले थप उपचारका लागि नेपालगन्ज र सुर्खेत पठाइएको छ।

यसैबीच, खोज तथा उद्धारका क्रममा भेरी नगरपालिका–२ साल्धारा निवासी ५४ वर्षीया उमा सिंह खत्री र ८३ वर्षीया रती खत्रीको शव फेला परेको छ।

पहिरोमा परी भेरी नगरपालिका–२ चिसापानीका ७० वर्षीय भीमबहादुर कार्की र गैरीगाउँका १४ वर्षीय हरिस विक अझै बेपत्ता छन्। हरिस पहिरोपछि घरबाट निस्किएपछि सम्पर्कविहीन भएका हुन्।

बेपत्ताको खोजी तथा उद्धारका लागि नेपाली सेना, सशस्त्र प्रहरी र नेपाल प्रहरीको संयुक्त टोली परिचालन गरिएको छ। सशस्त्र प्रहरी निरीक्षक कमल कार्कीको कमान्डमा विपद् व्यवस्थापन तालिम प्राप्त टोलीसमेत खोजीमा खटिएको छ।

सशस्त्र प्रहरीका केन्द्रीय सहप्रवक्ता डीएसपी शैलेन्द्र थापाका अनुसार बेपत्ताको खोजी तथा उद्धार कार्य जारी छ।