गेस्टहाउसमा यौन धन्दा

राजविराज, ११ मंसिर । राजविराज–३ स्थित लक्ष्मी गेस्टहाउसका सञ्चालक र म्यानेजरलाई प्रहरीले पक्राउ गरेको छ । गेस्टहाउसमा यौनधन्दा हुने गरेको सूचनाका आधारमा जिल्ला प्रहरी कार्यालयबाट खटिएको टोलीले गेस्टहाउसमा छापा मारी गेस्टहाउसका सञ्चालक राजविराज–६ निवासी ५७ वर्षीय अरुणकुमार मिश्र र म्यानेजर सप्तरीको महदेवा गाउँपालिका–२ निवासी ४१ वर्षीय रामप्रकाश मण्डललाई पक्राउ गरेको प्रहरीले जनाएको छ ।

सञ्चालक मिश्र र म्यानेजर मण्डलको मिलीभगतमा गेस्टहाउसमा विभिन्न प्रलोभनमा पारी जबर्जस्ती यौन धन्दामा लगाउने गरिएका पाँच जना युवतीलाई समेत फेला पारिएको जिल्ला प्रहरी कार्यालय सप्तरीका प्रवक्ता डीएसपी ढुण्डिराज नेउपानेले जानकारी दिए । अघिल्लो दिन साँझ पक्राउ परेका सञ्चालक मिश्र र म्यानेजर मण्डललाई आइतबार सप्तरी जिल्ला अदालतबाट मानव बेचबिखन तथा ओसारपसार कसुर मुद्दामा तीन दिनको म्याद थपी आवश्यक अनुसन्धान भइरहेको प्रहरीले जनाएको छ । गेस्टहाउसको कोठाबाट फेला परेका युवतीमध्ये चार जना सप्तरीका तथा एक जना सुनसरीकी रहेको प्रवक्ता नेउपानेले बताए ।

आर्थिक अवस्था कमजोर भएका कारण युवतीलाई गेस्टहाउसमा काम लगाइदिने भन्दै ल्याउने र पछि गएर थप रकम पाइने भन्दै जबर्जस्ती यौन धन्दामा संलग्न गराउने गरेको पाइएको प्रहरीको भनाइ छ । सो गेस्टहाउसमा सामूहिक रूपमा राखी यौनजन्य कार्यमा लगाउने गरेको खुल्न आएको छ । गेस्टहाउसमा फेला परेका युवतीहरूलाई भने आवश्यक सचेतनासहित अभिभावकको जिम्मा लगाउने तयारी गरिएको जिल्ला प्रहरी कार्यालय सप्तरीले जनाएको छ । यो खबर आजको राजधानि दैनिकले छापेको छ ।