सेतो खबर
काठमाडौं । नेपाली मूलकी अमेरिकी राजनीतिज्ञ सराहाना श्रेष्ठ अमेरिकाको न्युयोर्क राज्य विधानसभामा लगातार तेस्रो कार्यकालका लागि निर्वाचित भएकी छन् ।
नोभेम्बर ३ मा सम्पन्न निर्वाचनमा डेमोक्रेटिक पार्टीकी उम्मेदवार श्रेष्ठले रिपब्लिकन पार्टीका प्रतिस्पर्धी सान्तोस लोपेजलाई फराकिलो मतान्तरले पराजित गरेकी हुन् ।
न्युयोर्क राज्यको १०३औँ विधानसभा निर्वाचन क्षेत्रबाट प्रतिस्पर्धा गरेकी श्रेष्ठले कुल मतको ६९.२ प्रतिशत अर्थात् ४० हजार ११४ मत प्राप्त गरेकी छन् । उनका प्रतिस्पर्धी लोपेजले ३०.८ प्रतिशत अर्थात् १७ हजार ८४० मत प्राप्त गरेका छन् । श्रेष्ठ २२ हजार २७४ मतको अन्तरले विजयी भएकी हुन् ।
श्रेष्ठको यो लगातार तेस्रो चुनावी जित हो । उनी यसअघि सन् २०२२ मा पहिलोपटक न्युयोर्क राज्य विधानसभामा निर्वाचित भएकी थिइन् भने सन् २०२४ मा दोस्रो कार्यकालका लागि विजयी भएकी थिइन् ।
नेपाली मूलकी श्रेष्ठ अमेरिकी राज्य विधानसभामा निर्वाचित हुने पहिलो नेपाली मूलकी महिला हुन् । न्युयोर्क राज्य विधानसभामा पुग्ने उनी नेपाली मूलकी पहिलो विधायकसमेत हुन् ।
जलवायु परिवर्तन, स्वच्छ ऊर्जा र वातावरण संरक्षणका क्षेत्रमा सक्रिय श्रेष्ठका प्रमुख राजनीतिक प्राथमिकतामा जलवायु नीति, आवास, स्वास्थ्य सेवा, सार्वजनिक शिक्षा, श्रमिक अधिकार तथा बाल हेरचाह रहेका छन् ।
उनको तेस्रो कार्यकाल सन् २०२७ जनवरी १ देखि सुरु हुनेछ ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
