अमरेश सिंहको दाबी– बालेनले मेरो,रवि र प्रचण्डको पछाडि सुराकी लगाएको छ

काठमाडौं । राष्ट्रिय स्वतन्त्र पार्टी (रास्वपा)का सांसद डा. अमरेशकुमार सिंहले प्रधानमन्त्री बालेन्द्र शाह नेतृत्वको सरकारले आफू, पार्टी सभापति रवि लामिछाने र पूर्वप्रधानमन्त्री पुष्पकमल दाहाल ‘प्रचण्ड’को पछाडि सुराकी लगाएको दाबी गरेका छन् ।

प्राइम टेलिभिजनसँगको अन्तर्वार्तामा सिंहले सरकारको आलोचना गर्ने तथा राजनीतिक गतिविधिमा सक्रिय नेतामाथि सुराकी लगाउने काम भइरहेको दाबी गरेका हुन् ।

images
‘हिजो पनि जो बोल्थ्यो, त्यसको विरुद्धमा सुराकी लगाउँथ्यो । आज पनि जो बोलिराखेको छ, त्यसको विरुद्धमा सुराकी छ चाहे अमरेश सिंह होस्, चाहे रवि लामिछाने होस्, प्रचण्ड होस् । जो बोल्छ, त्यसलाई सुराकी आइहाल्छ । म राजनीतिज्ञ हुँ,मैले नेता नभेटेर कसलाई भेट्छु त ? चाहे सभापति रवि लामिछानेलाई भेट्छु,पार्टीका नेतालाई भेट्छु,या अरु पार्टीका नेतालाई भेट्छु,’ उनले भने।

सुराकी संयन्त्र राजनीतिक दलका नेता तथा कार्यकर्तामाथि निगरानी गर्न नभई अपराधिक गतिविधि नियन्त्रणमा प्रयोग हुनुपर्ने उनको भनाइ छ ।

आफ्नो पछाडि सुराकी लगाइएको विषयमा सञ्चालकले थप स्पष्टता मागेपछि सिंहले आफूले पाएको जानकारीका आधारमा यस्तो दाबी गरेको बताए । उनका अनुसार आफू मात्र नभई रवि लामिछानेमाथि समेत निगरानी भइरहेको छ ।

‘देशमा अपराध नियन्त्रण गर्न सुराकी प्रयोग गर्नुपर्ने हो कि नेता–नेताको घरअगाडि सुराकी राख्नुपर्ने हो ?’ उनले प्रश्न गरे ।

आफू जुनसुकै परिस्थितिका लागि तयार रहेको बताउँदै सिंहले पक्राउ परे पनि संविधान र लोकतन्त्रको पक्षमा उभिने बताए । उनले आफूहरू कुनै पनि ‘हुकुमी शासन’को मतियार नबन्ने दाबी गरे ।

सरकार आफ्नै पार्टीका सभापति र सांसदसँग किन डराएको भन्ने प्रश्नमा सिंहले त्यसको जवाफ सरकारका प्रवक्ताले दिनुपर्ने बताए ।

आफू सरकार सफल होस् भन्ने चाहने भए पनि सरकार आफ्नै कारणले असफल भए आफूले केही गर्न नसक्ने उनको भनाइ थियो ।

चोलेन्द्रलाई मध्यरातमा पक्राउ गरेकोमा आपत्ति

अन्तर्वार्ताका क्रममा पूर्वप्रधानन्यायाधीश चोलेन्द्रशमशेर राणालाई मध्यरातमा नियन्त्रणमा लिएको घटनाबारे पनि सिंहले आपत्ति जनाए । उनले गम्भीर अपराध वा कानुनको गम्भीर उल्लंघन नभएसम्म कुनै पनि नागरिकलाई राति घरबाट उठाउन नहुने बताए ।

‘जबसम्म कुनै सिभियर क्राइम छैन, कुनै ग्रस भाइलेसन अफ ल गरेको छैन भने राति १२ बजे उठाउन कुनै पनि नागरिकलाई पाइँदैन,’ उनले भने ।

प्रधानमन्त्री शाहले ‘हुकुमी शासन’ चलाउन खोजेको आरोप लगाउँदै सिंहले कोही पनि संविधानभन्दा माथि नरहेको बताए । राष्ट्रपति, प्रधानमन्त्री, सांसद वा आम नागरिक सबै संविधानको सीमाभित्र रहनुपर्ने उनको भनाइ थियो ।