सेतो खबर
काठमाडौं । सरकारले साउन १ गतेदेखि कार्यान्वयनमा ल्याएको ‘विद्युतीय ड्राइभिङ लाइसेन्स तथा सवारी दर्ता प्रणाली’ (ईडीएल भिआरएस) मार्फत सवारी चालक अनुमतिपत्र (ड्राइभिङ लाइसेन्स) छपाइको काम औपचारिक रूपमा सुरु गरेको छ।
भौतिक पूर्वाधार तथा यातायात मन्त्रालयअन्तर्गतको यातायात व्यवस्था विभागले सेवाग्राहीको अत्यधिक चाप तथा लामो समयदेखि थन्किँदै आएको लाइसेन्स छपाइसम्बन्धी समस्या समाधान गर्न नयाँ प्रविधिमा आधारित प्रणाली कार्यान्वयनमा ल्याएको हो।
नयाँ प्रणाली लागू भएसँगै नयाँ लाइसेन्स लिने तथा पुरानो लाइसेन्स नवीकरण गर्ने सेवाग्राहीको प्रक्रिया थप छिटो, सहज र प्रविधिमैत्री हुने विभागको अपेक्षा छ।
ईडीएल भिआरएसमा प्रविष्ट गरिएको सेवाग्राहीको विवरण सिधै सुरक्षण मुद्रण केन्द्रमा पुग्ने व्यवस्था मिलाइएको छ। केन्द्रले विवरण प्राप्त भएपछि लाइसेन्स छपाइ गर्नेछ र छपाइ सम्पन्न भएका लाइसेन्स हुलाकमार्फत सम्बन्धित यातायात व्यवस्था सेवा कार्यालयमा पठाइनेछ।
यस व्यवस्थाले विगतमा लाइसेन्स छपाइ तथा वितरणमा देखिँदै आएको ढिलाइ कम हुने र सेवाग्राहीले लामो समयसम्म लाइसेन्स पर्खिनुपर्ने समस्या समाधान हुने विभागको दाबी छ।
नयाँ प्रणालीअन्तर्गत पहिलो चरणमा मधेश प्रदेशका ३ हजार ८१ वटा सवारी चालक अनुमतिपत्र छपाइ गरिएको छ। छपाइ सम्पन्न भएका ती लाइसेन्स वितरणका लागि हुलाकमार्फत सम्बन्धित यातायात व्यवस्था सेवा कार्यालयमा पठाइसकिएको विभागले जनाएको छ।
नयाँ व्यवस्थाअनुसार प्रदेश सरकारले सुरक्षण मुद्रण केन्द्रसँग सम्झौता गरेर आफ्नै व्यवस्थापनमा सवारी चालक अनुमतिपत्र छपाइ गर्न सक्ने व्यवस्था गरिएको छ। सोही प्रावधानअनुसार मधेश प्रदेशले आफ्नै व्यवस्थापनमा लाइसेन्स छपाइ प्रक्रिया अघि बढाएको छ।
त्यसैगरी लुम्बिनी प्रदेश सरकारले पनि शुक्रबार सुरक्षण मुद्रण केन्द्रसँग सम्झौता गर्दै लाइसेन्स छपाइ प्रक्रिया अघि बढाएको छ।
प्रदेश सरकारले सुरक्षण मुद्रण केन्द्रसँग सम्झौता नगरेको अवस्थामा पनि सेवाग्राहीलाई असहज नहोस् भन्ने उद्देश्यले यातायात व्यवस्था विभाग र सुरक्षण मुद्रण केन्द्रको प्रत्यक्ष समन्वयमा लाइसेन्स छपाइ गर्ने व्यवस्था मिलाइने विभागले जनाएको छ।
नयाँ प्रणालीमार्फत लाइसेन्सको विवरण प्रविष्टिदेखि छपाइ र सम्बन्धित कार्यालयसम्म पुर्याउने प्रक्रियालाई डिजिटल तथा व्यवस्थित बनाइएकाले अब लाइसेन्स वितरणमा देखिँदै आएको पुरानो समस्या क्रमशः समाधान हुने विभागको विश्वास छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
