रोकिएन नेप्सेको ओरालो यात्राः १४ अंकले घटेस“गै २६ सय विन्दुमा बजार

काठमाडौं । नेपाल स्टक एक्सचेञ्ज (नेप्से) परिसूचक लगातार दोस्रो कारोबार दिन पनि ओरालो लागेको छ। बुधबार नेप्से १४.४५ अंक अर्थात् ०.५४ प्रतिशतले घट्दै २६६०.०२ विन्दुमा बन्द भएको हो। यसअघि मंगलबार पनि नेप्से २६.१६ अंकले घटेको थियो।

दिनभर उतारचढावपूर्ण कारोबार देखिए पनि बजार अन्त्यमा नकारात्मक दिशातर्फ झुकेको हो। यद्यपि, कारोबार रकममा भने सामान्य सुधार देखिएको छ। आज कुल ३३८ कम्पनीका एक करोड ७ लाख ७७ हजार ५८२ कित्ता सेयर ७२ हजार ९१७ पटक किनबेच हुँदा चार अर्ब ४१ करोड ८६ लाख रुपैयाँभन्दा बढीको कारोबार भएको छ। अघिल्लो दिन चार अर्ब ३६ करोड रुपैयाँ बराबरको कारोबार भएको थियो।

बजारमा अधिकांश कम्पनीका सेयरमूल्य घटेका छन्। आज केवल ६२ कम्पनीका सेयरमूल्य बढ्दा २०२ कम्पनीका सेयरमूल्य घटेका छन् भने १० कम्पनीको मूल्य स्थिर रहेको छ। यसले लगानीकर्ताको मनोबल अझै कमजोर रहेको संकेत गरेको छ।

१३ वटा उपसमूहमध्ये फाइनान्स र व्यापार समूह मात्रै हरियो देखिए। फाइनान्स समूहको सूचक ०.१९ प्रतिशत र व्यापार समूहको सूचक ०.८१ प्रतिशतले बढेको छ। बाँकी ११ उपसमूह भने राताम्मे बनेका छन्।

सबैभन्दा बढी गिरावट उत्पादन तथा प्रशोधन समूहमा देखिएको छ, जसको सूचक १.१० प्रतिशतले घट्यो। त्यस्तै अन्य समूह १.०२ प्रतिशत, निर्जीवन बिमा ०.६४ प्रतिशत, होटल तथा पर्यटन ०.६२ प्रतिशत, जलविद्युत् ०.६२ प्रतिशत, विकास बैंक ०.५७ प्रतिशत तथा वाणिज्य बैंक समूह ०.४८ प्रतिशतले ओरालो लागेका छन्।

व्यक्तिगत कम्पनीतर्फ भने केही सेयरमा उत्साहजनक प्रदर्शन देखिएको छ। टक्सार पिखुवाखोला हाइड्रोपावर कम्पनी लिमिटेड र याम्बालिङ हाइड्रोपावर लिमिटेडका लगानीकर्ताले १५ प्रतिशतसम्म आम्दानी गरेका छन्। यी दुवै कम्पनीको सेयरमूल्यमा सकारात्मक सर्किट लागेको हो।

विपरीत रूपमा, सोपान फर्मास्युटिकल्स लिमिटेडका लगानीकर्ताले सबैभन्दा बढी ५.०५ प्रतिशत घाटा व्यहोरेका छन्।

कारोबार रकमका आधारमा आँखुखोला जलविद्युत् लिमिटेड अग्रस्थानमा रह्यो। कम्पनीको २९ करोड ६२ लाख रुपैयाँभन्दा बढीको सेयर कारोबार भएको छ।

यस्तै कारोबार भएको सेयर संख्याका आधारमा कुमारी धनवृद्धि योजना शीर्ष स्थानमा रह्यो। उक्त योजनाको ९ लाख ६ हजार ७०० युनिट कारोबार हुँदा प्रतियुनिट अन्तिम मूल्य १० रुपैयाँ ९५ पैसा कायम भएको छ।

लगातार दोस्रो दिनको गिरावटले बजारमा बिक्री दबाब अझै कायम रहेको संकेत गरेको छ। यद्यपि कारोबार रकम स्थिर रहनु र केही कम्पनीमा सकारात्मक सर्किट लाग्नुले लगानीकर्ताहरू चयनात्मक रूपमा सक्रिय रहेको देखिन्छ।