सुनको मूल्यमा गिरावट, चाँदीको भाउ बढ्यो

काठमाडौं । स्थानीय बजारमा सुनको मूल्यमा सामान्य गिरावट आएको छ भने चाँदीको मूल्य बढेको छ।

नेपाल सुनचाँदी व्यवसायी महासंघका अनुसार सोमबार छापावाला सुनको मूल्य प्रतितोला दुई सय रुपैयाँले घटेर तीन लाख ९ हजार ९०० रुपैयाँ कायम भएको छ। आइतबार सुन प्रतितोला तीन लाख १० हजार १०० रुपैयाँ मा कारोबार भएको थियो।

सरकारले सुन आयातमा लाग्ने भन्सार महसुल दरमा १० प्रतिशत थप गरेपछि आइतबार मात्रै सुनको मूल्य एकैदिन २० हजार ५०० रुपैयाँले वृद्धि भएको थियो। उक्त असामान्य वृद्धिपछि सोमबार भने बजारमा सामान्य सुधार देखिएको हो।

यता चाँदीको मूल्य भने बढेको छ। आइतबार प्रतितोला पाँच हजार ३४५ रुपैयाँ मा कारोबार भएको चाँदी सोमबार १० रुपैयाँले बढेर पाँच हजार ३५५ रुपैयाँ पुगेको महासंघले जनाएको छ।

अन्तर्राष्ट्रिय बजारको उतारचढाव, विनिमय दर तथा सरकारी कर नीतिको प्रभावका कारण पछिल्लो समय सुनचाँदीको मूल्यमा उल्लेखनीय परिवर्तन देखिँदै आएको छ। व्यवसायीहरूले आगामी दिनमा पनि बजारको अवस्थाअनुसार मूल्यमा थप उतारचढाव आउन सक्ने बताएका छन्।