दृष्टिविहीनका लागि कामना सेवा विकास बैंकको समावेशी बैंकिङ पहल

काठमाडौं । [कामना सेवा विकास बैंकले समावेशी बैंकिङलाई प्रवर्द्धन गर्दै दृष्टिविहीन व्यक्तिहरूलाई बैंकिङ सेवाको पहुँचसँग जोड्ने उद्देश्यले वित्तीय साक्षरता तथा हस्ताक्षर तालिम कार्यक्रम सम्पन्न गरेको छ।

सर्वोदय परियोजना सँगको सहकार्यमा आयोजित कार्यक्रममा दृष्टिविहीन व्यक्तिहरूका लागि दुईदिने कार्यशाला गोष्ठी सञ्चालन गरिएको थियो। कार्यक्रममा बचतको महत्व, व्यक्तिगत तथा पारिवारिक बजेट निर्माण, आर्थिक अनुशासन, आर्थिक लक्ष्य निर्धारण, भविष्यका लगानीका अवसर, डिजिटल कारोबार तथा डिजिटल ठगी जस्ता विषयमा जानकारी प्रदान गरिएको बैंकले जनाएको छ।

कार्यक्रममा बैंकका ब्रान्डिङ तथा सीएसआर प्रमुख सुशील पौडेलले वित्तीय साक्षरता सम्बन्धी प्रशिक्षण दिएका थिए। साथै, बैंकिङ कारोबारमा आवश्यक पर्ने हस्ताक्षर सम्बन्धी व्यवहारिक अभ्यासलाई विशेष प्राथमिकता दिइएको थियो। यसबाट सहभागीहरूलाई आत्मविश्वासी बनाउँदै बैंकिङ प्रक्रिया सहज रूपमा प्रयोग गर्न सहयोग पुग्ने विश्वास बैंकले व्यक्त गरेको छ।

तालिममा ४० जना दृष्टिविहीन व्यक्तिहरूको सहभागिता रहेको थियो। कार्यक्रममा बोल्दै सर्वोदय परियोजनाका अध्यक्ष युवराज वाग्ले ले कामना सेवा विकास बैंकले समावेशी बैंकिङतर्फ गरेको पहल प्रशंसनीय रहेको बताउँदै कार्यक्रम उपयोगी र प्रभावकारी भएको प्रतिक्रिया दिएका थिए। सर्वोदय परियोजनाकै सौगात वाग्ले ले आफू पनि दृष्टिविहीन भए पनि अन्य व्यक्तिहरू सरह सुरक्षित रूपमा बैंकिङ सेवा उपयोग गरिरहेको अनुभव साझा गरेका थिए।

बैंकले दृष्टिविहीन व्यक्तिहरूलाई लक्षित गर्दै ‘स्वाभिमान बचत खाता’ सञ्चालनमा ल्याएको छ। यस खातामार्फत मोबाइल बैंकिङ, एटीएम कार्ड लगायतका सुविधा उपयोग गर्न सकिनेछ। साथै, खाता खोल्न दृष्टिविहीन भएको कारणले अतिरिक्त कागजात वा साक्षी आवश्यक नपर्ने तथा खाता सञ्चालनसम्बन्धी शर्तहरू ब्रेल लिपिमा समेत उपलब्ध गराइँदै आएको बैंकले जनाएको छ।

कार्यक्रमको समापनमा सुशील पौडेलले आगामी दिनमा यस्ता तालिमलाई अझ प्रभावकारी र व्यापक बनाउँदै दृष्टिविहीन व्यक्तिहरूलाई आत्मनिर्भर र सहज बैंकिङ अभ्यासतर्फ अभिप्रेरित गर्ने प्रतिबद्धता व्यक्त गरे। बैंकले यस्ता कार्यक्रममार्फत वित्तीय पहुँच विस्तारसँगै आत्मविश्वास र सामाजिक समावेशितामा सकारात्मक योगदान पुग्ने विश्वास व्यक्त गरेको छ।