न्यायालयले मलाई बचायो, जसकारण नेपाल आउन पाएँ : देउवा

काठमाडौं । नेपाली कांग्रेसका पूर्वसभापति शेरबहादुर देउवाले आफूले विशेष महाधिवेशन नचाहेको भए पनि आफ्नो असहमतिका बीच जबर्जस्ती आयोजना गरिएको बताएका छन्।

काठमाडौंमा आयोजित विशेष महाधिवेशनको समापन समारोहलाई सम्बोधन गर्दै देउवाले विशेष महाधिवेशन सबैको सहमतिमा गर्नुपर्ने आफ्नो धारणा रहेको बताए। तर आफ्नो असहमतिका बीच धेरै नेता–कार्यकर्तालाई बाहिर राखेर महाधिवेशन गरिएको उनको आरोप छ।

“विशेष अधिवेशनलाई मैले मानेको पनि थिइनँ। सबैको सहमतिमा विशेष महाधिवेशन गरौँ भनेको थिएँ। जबर्जस्ती गरेर धेरै साथीलाई बाहिर राखियो। अदालत गयौँ। अदालतको निर्णय आउन बाँकी छ।”

देउवाले आफूहरू विशेष महाधिवेशनको निर्णयविरुद्ध अदालत गएको र मुद्दाको अन्तिम फैसला आउन बाँकी रहेको बताए।

न्यायालयप्रति आफूलाई विश्वास रहेको उल्लेख गर्दै देउवाले विगतमा राजाको शासनकालमा समेत सर्वोच्च अदालतले आफूलाई थुनामुक्त गरेको स्मरण गरे।

उनले अहिले पनि न्यायालयले आफूलाई न्याय दिने विश्वास व्यक्त गरे। अदालतको विषयमा धेरै टिप्पणी गर्न आवश्यक नरहेको उनको भनाइ थियो।

“सर्वोच्चले राजाले थुन्दा पनि छुटाएको हो। अहिले पनि न्यायालयले मलाई बचाएको छ। जसको कारणले म नेपालमा आएको छु।”

देउवाले न्यायालयले आफूलाई न्याय दिने विश्वास व्यक्त गर्दै कांग्रेसभित्र देखिएको विवाद पनि कानुनी प्रक्रियाबाट टुंगिने संकेत गरेका छन्।