शेरबहादुर जी नै हाम्रो सभापति हो, उहाकै नेतृत्वमा कांग्रेस अघि बढ्छः शशांक

नेपाली कांग्रेस संस्थापनइतर पक्षका नेता डा. शशांक कोइरालाले पार्टीको आन्तरिक एकता सुदृढ गर्नु आफ्नो प्रमुख दायित्व भएको बताएका छन् ।

शुक्रबारदेखि सुरु भएको संस्थापनइतर पक्षको राष्ट्रिय भेलालाई सम्बोधन गर्दै कोइरालाले कांग्रेस एकताबद्ध भए कसैले पनि पराजित गर्न नसक्ने दाबी गरे ।

सम्बोधनका क्रममा कोइरालाले कांग्रेसका पूर्वसभापति एवं पूर्वप्रधानमन्त्री शेरबहादुर देउवासँगका पुराना र ऐतिहासिक प्रसंगसमेत स्मरण गरे । उनले बीपी कोइरालाले देउवालाई ‘पश्चिमको राजकुमार’ भन्ने गरेको उल्लेख गर्दै बनारसमा रहँदाका स्मृतिहरू सुनाए ।

बीपीको निर्देशनमा आफूले देउवालाई बनारस घुमाएको स्मरण गर्दै कोइरालाले त्यतिबेला सँगै चलचित्र हेरेको र चलचित्रको सूक्ष्म तथा हुबहु विश्लेषण गर्ने देउवाको क्षमताबाट आफू प्रभावित भएको बताए ।

कांग्रेसको राजनीतिक इतिहासको चर्चा गर्दै उनले लोकतन्त्र स्थापना भएपछि तत्कालीन नेता गिरिजाप्रसाद कोइरालाको आग्रहमा लन्डनबाट नेपाल फर्किएलगत्तै देउवा प्रधानमन्त्री बनेको प्रसंग पनि उल्लेख गरे ।

‘उहाँ अत्यन्त भाग्यमानी र प्रभावशाली नेता हुनुहुन्छ । शेरबहादुर जी नै हाम्रो नेता र सभापति हुनुहुन्छ, उहाँकै नेतृत्वमा नेपाली कांग्रेस अगाडि बढ्छ,’ कोइरालाले भने ।

संस्थापनइतर पक्षले राष्ट्रिय भेला आयोजना गरे पनि कोइरालाले देउवाको नेतृत्वप्रति पूर्ण समर्थन जनाएका छन् । उनले देउवाको उपस्थितिले कार्यक्रम थप सफल हुने विश्वास व्यक्त गर्दै देशभरबाट भेलामा सहभागी भएका नेता–कार्यकर्तालाई स्वागतसमेत गरे ।

यसअघि निवर्तमान सभापति एवं पूर्वप्रधानमन्त्री शेरबहादुर देउवाले काठमाडौंको सुकेधारास्थित मिराकल पार्टी प्यालेसमा आयोजित राष्ट्रिय भेलाको उद्घाटन गरेका थिए ।

विशेष महाधिवेशनबाट आएको गगन थापा नेतृत्वको केन्द्रीय समितिलाई चुनौती दिँदै देउवा र डा. कोइराला पक्षले आयोजना गरेको यस भेलालाई कांग्रेसभित्रको शक्ति प्रदर्शनका रूपमा हेरिएको छ ।

साउन २९ देखि ३१ गतेसम्म चल्ने भेलामा कांग्रेसभित्रको पछिल्लो राजनीतिक अवस्था, पार्टी नेतृत्वसम्बन्धी विवाद, सांगठनिक विषय तथा आगामी राजनीतिक रणनीतिबारे छलफल हुने बताइएको छ ।