सेतो खबर
नेकपा एमालेका अध्यक्ष केपी शर्मा ओली शनिबार आफ्नो गृहजिल्ला झापा जाने भएका छन् । गत फागुन २१ गते सम्पन्न प्रतिनिधिसभा निर्वाचनपछि ओली पहिलोपटक झापा जान लागेका हुन् ।
ओलीको सचिवालय प्रमुख निरुदेवी पालका अनुसार ओली शनिबार बिहान पहिलो उडानबाट झापा जाने कार्यक्रम रहेको छ । निर्वाचनपछि यो उनको पहिलो गृहजिल्ला भ्रमण हुनेछ ।
‘अध्यक्षज्यू भोलि बिहान पहिलो फ्लाइटबाट झापा जाने कार्यक्रम छ । उहाँ चुनावपछि पहिलो पटक गृहजिल्ला पुग्दै हुनुहुन्छ,’ सचिवालयले जनाएको छ ।
ओलीले प्रतिनिधिसभा निर्वाचनमा झापा–५ बाट उम्मेदवारी दिएका थिए । तर, सोही क्षेत्रबाट राष्ट्रिय स्वतन्त्र पार्टी (रास्वपा)का वरिष्ठ नेता वालेन्द्र शाह (बालेन)सँग उनी पराजित भएका थिए ।
निर्वाचनमा शाहले ६८ हजार ३४८ मत प्राप्त गर्दा ओलीले १८ हजार ७३४ मत पाएका थिए । ओली ४९ हजार ६१४ मतको फराकिलो अन्तरले पराजित भएका थिए ।
लामो समयदेखि एमालेको बलियो प्रभाव रहेको झापा–५ मा ओलीको पराजयलाई उनको राजनीतिक यात्राकै महत्वपूर्ण चुनावी धक्काका रूपमा हेरिएको थियो । विशेषगरी नयाँ राजनीतिक शक्तिका रूपमा अघि आएको रास्वपाका नेता बालेनसँग भएको प्रतिस्पर्धा र परिणामले राष्ट्रिय राजनीतिमा समेत चर्चा पाएको थियो ।
निर्वाचनपछि बालेनको नेतृत्वमा सरकार गठन भएको छ । त्यसपछि भदौ २३ र २४ गते भएका घटनाबारे छानबिन गर्न गठित गौरीबहादुर कार्की नेतृत्वको आयोगले फौजदारी अनुसन्धान गर्न सिफारिस गरेपछि ओलीलाई भक्तपुरको गुण्डुस्थित निवासबाट चैत १४ गते बिहान प्रहरीले नियन्त्रणमा लिएको थियो ।
पछिल्लो राजनीतिक घटनाक्रम र निर्वाचनमा भएको पराजयपछि ओलीको पहिलो झापा भ्रमणलाई एमालेभित्र तथा बाहिर चासोका साथ हेरिएको छ । भ्रमणका क्रममा ओलीले पार्टीका नेता–कार्यकर्ता तथा स्थानीयसँग भेटघाट गर्ने र समसामयिक राजनीतिक विषयमा धारणा राख्ने अपेक्षा गरिएको छ ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
