सेतो खबर
काठमाडौं । नेपाली कांग्रेसका सभापतिका उम्मेदवार गगनकुमार थापाले महाधिवेशन प्रक्रियामा सहभागी नभएका नेता तथा निर्वाचनमा पराजित हुने सबैलाई समेटेर अघि बढ्ने बताएका छन्।
महाधिवेशनस्थलमा पत्रकारहरूसँग कुरा गर्दै थापाले पार्टीभित्र रहेका असन्तुष्टिलाई सम्बोधन गर्दै सबैलाई उचित जिम्मेवारी दिएर अघि बढ्ने बताएका हुन्। उनको भनाइ महाधिवेशन प्रक्रियामा सहभागी नभएको देउवा समूहप्रति लक्षित रहेको बुझिएको छ।
थापाले महाधिवेशन प्रक्रियाबाहिर रहेका नेताहरूलाई पनि पार्टीमा फर्काएर एकताबद्ध बनाउने प्रयास गर्ने बताए। कांग्रेसभित्रको असन्तुष्टिलाई सम्बोधन गर्न आफू तयार रहेको उनको भनाइ छ।
‘पार्टीका केही साथीहरू हाम्रो प्रक्रियामा सहभागी नभएर अहिले बाहिर हुनुहुन्छ। हामी उहाँहरूलाई समेट्ने कोसिस गर्छौं। कोही पार्टी नै नयाँ खोलेर जान्छु भन्नुहुन्छ भने त्यो उहाँहरूको च्वाइस हो। तर कांग्रेसभित्रको असन्तुष्टि हो भने त्यसलाई सम्बोधन गर्ने कोसिस गर्छौं,’ थापाले भने।
उनले महाधिवेशनमा प्रतिस्पर्धा गरेका र पराजित हुने नेताहरूलाई समेत पार्टीमा उचित जिम्मेवारी दिएर अघि बढाउने बताए। कांग्रेसका हरेक व्यक्ति महत्त्वपूर्ण रहेको उल्लेख गर्दै उनले कतिपयलाई केन्द्रीय समितिमा समेट्ने र कतिपयलाई अन्य जिम्मेवारी दिने गरी सबैलाई साथमा लिएर अघि बढ्ने धारणा राखे।
‘कतिपय साथीलाई केन्द्रीय समितिमा फेरि जोडेर ल्याउने होला, कतिपय साथीलाई अरू जिम्मेवारी दिने होला। तर सबैलाई समेटेर लिएर जाने हो,’ उनले भने।
थापाले आफूले पनि विगतमा पार्टीको निर्वाचनमा पराजय भोगेको अनुभव सुनाउँदै हार–जितलाई स्वाभाविक रूपमा लिनुपर्ने बताए। एकपटक कम मत ल्याएर पराजित भए पनि पार्टीमै रहेर काम र संघर्ष गर्दै जाँदा अर्को पटक धेरै मतसहित निर्वाचित भएको उनको भनाइ थियो।
पार्टीभित्रको प्रतिस्पर्धालाई व्यक्तिगत तिक्ततामा बदल्न नहुने सन्देश दिँदै थापाले सबै पक्षलाई समेटेर कांग्रेसलाई अघि बढाउने प्रतिबद्धता व्यक्त गरेका छन्।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
