सेतो खबर
काठमाडौँ । नबिल बैंक लिमिटेडको ४२औँ वार्षिक साधारणसभाले आर्थिक वर्ष २०८२/८३ को मुनाफाबाट शेयरधनीलाई १५.८० प्रतिशत लाभांश वितरण गर्ने प्रस्ताव पारित गरेको छ। प्रस्तावअनुसार साधारण शेयरधनीले पाँच प्रतिशत बोनस शेयर र १०.८० प्रतिशत नगद लाभांश पाउनेछन्।
बैंकका अध्यक्ष निर्वाणकुमार चौधरीको अध्यक्षतामा बिहीबार काठमाडौँको भद्रकालीस्थित त्रिभुवन आर्मी अफिसर्स क्लबमा सम्पन्न साधारणसभाले उक्त प्रस्ताव पारित गरेको हो। सभाले अविमोच्य असञ्चिति अग्राधिकार शेयरधनीका लागि आठ प्रतिशत लाभांश वितरण गर्ने प्रस्तावसमेत स्वीकृत गरेको छ।
बैंकका अनुसार पाँच प्रतिशत बोनस शेयर वितरणपछि बैंकको चुक्ता पुँजी ३३ अर्ब ४० करोड रुपैयाँभन्दा बढी पुगेको छ। बैंक स्थापना हुँदाको तुलनामा हाल चुक्ता पुँजी ९६० गुणाले वृद्धि भएको जनाइएको छ।
नबिल बैंकले आर्थिक वर्ष २०८२/८३ मा सात अर्ब ९१ करोड रुपैयाँ खुद मुनाफा आर्जन गरेको जनाएको छ। बैंकको निक्षेप दायित्व अघिल्लो आर्थिक वर्षको तुलनामा ६९ अर्ब ६७ करोड रुपैयाँ अर्थात् १३.०६ प्रतिशतले बढेर छ खर्ब दुई अर्ब ९३ करोड रुपैयाँ पुगेको छ।
त्यस्तै, बैंकको कर्जा तथा सापटी ५१ अर्ब ६८ करोड रुपैयाँ अर्थात् १२.१५ प्रतिशतले वृद्धि भई चार खर्ब ७६ अर्ब ८७ करोड रुपैयाँ पुगेको छ। समीक्षा अवधिमा बैंकको वासलातको आकार १५.३८ प्रतिशतले बढेर सात खर्ब ३४ अर्ब ७६ करोड रुपैयाँ पुगेको बैंकले जनाएको छ।
साधारणसभाले संस्थापक शेयरधनीका तर्फबाट निर्वाणकुमार चौधरी, मलय मुखर्जी र सइद मन्सुर मुस्तफालाई सञ्चालक समितिमा निर्विरोध निर्वाचित गरेको छ।
सभालाई सम्बोधन गर्दै अध्यक्ष चौधरीले संस्थागत सुशासन र ग्राहक सन्तुष्टिलाई प्राथमिकतामा राखेर बैंकिङ सेवालाई आधुनिकीकरण तथा विस्तार गर्दै आएको बताए। बैंकले शेयरधनी, ग्राहक, कर्मचारी, नियामक निकाय र अन्य सरोकारवालाको अधिकार तथा हितलाई सम्मान गर्दै सामाजिक उत्तरदायित्वका क्षेत्रमा पनि सक्रिय भूमिका निर्वाह गरिरहेको उनको भनाइ थियो।
चार दशकभन्दा लामो समयदेखि बैंकिङ सेवा प्रदान गर्दै आएको नबिल बैंकले पछिल्लो समय दिगो बैंकिङ र डिजिटल प्रविधिलाई प्राथमिकता दिएको छ। बैंकले डिजिटल बैंकिङ सेवाका लागि एनबैंक सञ्चालनमा ल्याएको छ भने सन् २०३० सम्ममा कृत्रिम बुद्धिमत्ता (एआई) प्रयोगका लागि तयार बैंक बन्ने लक्ष्य अघि सारेको छ।
बैंकले आफ्नो भिजन तथा मिसन स्टेटमेन्टलाई परिमार्जन गर्दै ‘पाँच टी’ अर्थात् ट्रस्ट (विश्वास), ट्रान्सपरेन्सी (पारदर्शिता), ट्यालेन्ट (प्रतिभा), टेक्नोलोजी (प्रविधि) र ट्रान्सफर्मेसन (रूपान्तरण) को अवधारणालाई समेत अघि बढाएको जनाएको छ।
हाल नबिल बैंकले देशभरका २६२ शाखा र ३१६ एटीएममार्फत २८ लाखभन्दा बढी ग्राहकलाई बैंकिङ सेवा प्रदान गर्दै आएको छ।
साधारणसभा समयमै सम्पन्न गर्न सहयोग गर्ने शेयरधनी, नियामक निकाय, ग्राहक, कर्मचारी तथा अन्य सम्बद्ध निकायप्रति बैंकले आभार व्यक्त गरेको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
