सेतो खबर
काठमाडौं । कामना सेवा विकास बैंक लिमिटेड र नेपाल उद्योग वाणिज्य महासंघबीच साना तथा मझौला व्यवसायीको व्यवसायिक क्षमता अभिवृद्धिका लागि तालिम सञ्चालन गर्ने सम्झौता भएको छ।
सम्झौताअनुसार सातै प्रदेशमा रहेका साना तथा मझौला व्यवसायीलाई वित्तीय ज्ञान, व्यवसायिक क्षमता र वित्तीय अनुशासनसम्बन्धी तालिम सञ्चालन गरिनेछ।
महासंघको केन्द्रीय कार्यालयमा आयोजित कार्यक्रममा कामना सेवा विकास बैंकका नायब प्रमुख कार्यकारी अधिकृत विनय दाहाल र नेपाल उद्योग वाणिज्य महासंघका महानिर्देशक डा. गोपाल तिवारीले सम्झौतापत्रमा हस्ताक्षर गरेका हुन्। कार्यक्रममा महासंघका अध्यक्ष अञ्जन श्रेष्ठ, वरिष्ठ उपाध्यक्ष सुरकृष्ण वैद्यलगायत पदाधिकारी तथा परिषद् सदस्यहरूको उपस्थिति थियो।
कार्यक्रममा बोल्दै महासंघका वरिष्ठ उपाध्यक्ष वैद्यले सम्झौतापछि सातै प्रदेशमा क्रमिक रूपमा क्षमता अभिवृद्धिका कार्यक्रम सञ्चालन गरिने बताए। यस्ता तालिमले उद्योगी व्यवसायीको वित्तीय ज्ञान बढाउनुका साथै वित्तीय अनुशासन कायम गर्न सहयोग पुग्ने उनले बताए।
बैंकका नायब प्रमुख कार्यकारी अधिकृत दाहालले उद्योगी व्यवसायीलाई आफ्नो वित्तीय विवरण तयार गर्न तथा वित्तीय अनुशासन कायम गर्न आवश्यक ज्ञान र सीप प्रदान गर्ने उद्देश्यले तालिम सञ्चालन गरिने बताए। तालिमका लागि आवश्यक प्राविधिक सहयोग बैंकले उपलब्ध गराउने उनले जानकारी दिए।
कामना सेवा विकास बैंकले ‘Future Ready’ अवधारणाअनुसार सुरक्षित, जिम्मेवार, प्रविधिमैत्री तथा दिगो बैंकिङ अभ्यासमार्फत दीर्घकालीन संस्थागत सुदृढीकरण र व्यवसाय विस्तारलाई प्राथमिकता दिँदै आएको जनाएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
