सेतो खबर
काठमाडौं । प्रधानमन्त्री वालेन्द्र शाह ‘बालेन’को सचिवालयमा २५ जना पदाधिकारी कार्यरत रहेको विवरण सार्वजनिक भएको छ। प्रधानमन्त्री तथा मन्त्रिपरिषद्को कार्यालयले सार्वजनिक गरेको विवरणमा सचिवालयमा रहेका सल्लाहकार, विज्ञ तथा स्वकीय सचिवालयका पदाधिकारीको नाम, जिम्मेवारी र उनीहरूले पाउने सेवा–सुविधाको तह उल्लेख गरिएको छ।
सार्वजनिक विवरणअनुसार प्रधानमन्त्रीको सचिवालयमा तीन जनाले मन्त्रीसरहको सुविधा पाउने गरेका छन्। मुख्य सल्लाहकार कुमार ब्यञ्जनकार, राजनीतिक सल्लाहकार असिम शाह र स्वास्थ्य सल्लाहकार प्रा.डा. जगदीशप्रसाद अग्रवाललाई मन्त्रीसरहको सुविधा दिइएको छ। ब्यञ्जनकार र अग्रवाल भने अवैतनिक रूपमा कार्यरत रहेको विवरणमा उल्लेख छ।
त्यस्तै, नीति, प्रशासन तथा सुशासन सल्लाहकार सुदीप ढकाल र सूचना तथा सञ्चार प्रविधि सल्लाहकार विवेक मिश्रलाई राज्यमन्त्रीसरहको सुविधा दिइएको छ।
प्रधानमन्त्रीका प्रमुख स्वकीय सचिव सुवास शर्मालाई सचिवसरहको सुविधा दिइएको छ। नवीन भण्डारी, सञ्जीव पाण्डे, दीपा दाहाल, सन्तोष गिरी र विश्व राई सहसचिवसरहको सुविधामा कार्यरत छन्।
प्रकृति ढकाल, विशाल अधिकारी, विनय शाक्य, सुमन गौतम र रवि किरण अधिकारी उपसचिवसरहको सुविधामा रहेको विवरणमा उल्लेख छ।
त्यस्तै, सुरेन्द्र बजगाईं, रोशन तामाङ, बेदानन्द जोशी र हेम नारायणदास चौधरी शाखा अधिकृतसरहको सुविधामा कार्यरत छन्।
प्रशासन तथा प्राविधिकतर्फ अनुप थापामगर, ऋषि थापा, अमृत पाण्डे, राजकुमार गौतम र बेनिस कार्की नायब सुब्बासरहको सुविधामा कार्यरत रहेको प्रधानमन्त्री तथा मन्त्रिपरिषद्को कार्यालयले जनाएको छ।
प्रधानमन्त्री तथा मन्त्रिपरिषद्को कार्यालयले यसअघि प्रतिनिधि सभामा दिएको लिखित जवाफमा प्रधानमन्त्रीको सचिवालयमा २७ जना नियुक्त रहेको जानकारी दिएको थियो। सचिवालयका लागि कुल ४८ जनाको दरबन्दी रहेको पनि कार्यालयले जनाएको थियो।
तर, शुक्रबार सार्वजनिक गरिएको नयाँ विवरणमा भने २५ जनाको मात्रै नाम समावेश गरिएको छ। यसअघि २७ जना नियुक्त रहेको जानकारी दिइएको र अहिले २५ जनाको विवरण सार्वजनिक हुनुको कारणबारे कार्यालयको पछिल्लो विवरणमा स्पष्ट जानकारी दिइएको छैन।
यससँगै प्रधानमन्त्रीको सचिवालयमा वास्तविक रूपमा कति जना कार्यरत छन् र यसअघि उल्लेख गरिएका दुई जनाको विवरण अहिले किन समावेश गरिएन भन्ने प्रश्न उठेको छ।
प्रधानमन्त्री वालेन्द्र शाहले २७ मार्च २०२६ मा प्रधानमन्त्रीको पदभार सम्हालेका थिए।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
