सेतो खबर
काठमाडौं । सर्वोच्च अदालतले राजनीतिक विश्लेषक तथा त्रिमूल नेपालका अध्यक्ष भरतमणि दाहाललाई तत्काल रिहा गर्न आदेश दिएको छ।
दाहालले सामाजिक सञ्जालमार्फत ‘ग्रे-जोन’ सम्बन्धी रिपोर्टबारे आफ्नो धारणा सार्वजनिक गरेका थिए। सोही विषयसँग सम्बन्धित विवादास्पद अन्तर्वार्तापछि नेपाल प्रहरीको साइबर ब्युरोले उनलाई असोज ४ गते मोरङको बेलबारीबाट पक्राउ गरेको थियो। उनलाई विद्युतीय कारोबार ऐनअन्तर्गत अनुसन्धानका लागि काठमाडौं पठाइएको थियो।
दाहालको पक्राउ गैरकानुनी भएको दाबी गर्दै उनकी छोरी डेनिका दाहालले सर्वोच्च अदालतमा बन्दीप्रत्यक्षीकरणको रिट दायर गरेकी थिइन्। रिटमाथि प्रारम्भिक सुनुवाइ गर्दै असोज ६ गते न्यायाधीश कुमार रेग्मीको एकल इजलासले दाहाललाई पक्राउ गरी थुनामा राख्नुको आधार र कारणसहित २४ घण्टाभित्र अनुसन्धानको मिसिल र बन्दीसहित अदालतमा उपस्थित गराउन सरकारका नाममा आदेश दिएको थियो।
त्यसपछि बन्दीप्रत्यक्षीकरणको रिटमाथि बिहीबार न्यायाधीशद्वय कुमार रेग्मी र मेघराज पोखरेलको संयुक्त इजलासमा सुनुवाइ भएको हो। सुनुवाइपछि इजलासले दाहाललाई रिहा गर्न आदेश दिएको जनाइएको छ।
यसअघि काठमाडौं जिल्ला अदालतले पहिलोपटक तीन दिनको म्याद थप गर्दा अनुसन्धान तथा बयान कार्य पूरा गर्ने आधार लिएको थियो। तर, दाहालको बयान असोज ६ गते नै सम्पन्न भइसकेको विषयलाई समेत सर्वोच्च अदालतले ध्यानमा राखेको जनाइएको छ।
दाहाललाई पक्राउ गरी थुनामा राख्ने विषयमा उनकी छोरीले दायर गरेको बन्दीप्रत्यक्षीकरण रिटमा सर्वोच्चले यसअघि नै सरकारसँग पक्राउको कानुनी आधार र अनुसन्धानसम्बन्धी विवरण मागेको थियो।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
