माछापुच्छ्रे बैंकको ‘बिल जितौं’ सुविधा सञ्चालन, दैनिक १ लाख र बम्परमा १० लाख रुपैयाँ जित्ने अवसर

काठमाडौं । माछापुच्छ्रे बैंक लिमिटेडले नेपाल सरकारको ‘करदाता प्रोत्साहन उपहार कार्यक्रम’ लाई सहयोग पुर्‍याउने उद्देश्यले आफ्नो एमबीएल एम–स्मार्ट (MBL M-Smart) मोबाइल बैंकिङ एपमा ‘बिल जितौं (IRD) सुविधा सञ्चालनमा ल्याएको छ।

नेपाल सरकारको आर्थिक वर्ष २०८३/८४ को बजेटअनुसार आन्तरिक राजस्व विभागले बिल लिने संस्कृतिको विकास, डिजिटल भुक्तानीलाई प्रोत्साहन तथा कर प्रणालीलाई थप पारदर्शी बनाउने उद्देश्यले सञ्चालन गरेको उक्त कार्यक्रममा अब माछापुच्छ्रे बैंकका ग्राहक पनि सहज रूपमा सहभागी हुन सक्ने भएका छन्।

बैंकका अनुसार नेपालभित्र व्यक्तिगत प्रयोजनका लागि १०० रुपैयाँभन्दा बढी मूल्यका वस्तु वा सेवा खरिद गरी बैंक वा वालेटको मर्चेन्ट क्यूआर (Merchant QR) मार्फत डिजिटल भुक्तानी गर्ने ग्राहकका योग्य कारोबार स्वतः आन्तरिक राजस्व विभागको प्रणालीमा समावेश हुनेछन्। यसका लागि कुनै छुट्टै दर्ता गर्नुपर्ने आवश्यकता पर्दैन।

ग्राहकहरूले एमबीएल एम–स्मार्ट एपमा लगइन गरी ‘बिल जितौं (IRD)’ मेनुमा प्रवेश गरेपछि उपहार कार्यक्रमका लागि योग्य भएका कारोबारको संख्या, विस्तृत विवरण तथा आफू उपहार विजेता भए–नभएको जानकारी सहज रूपमा हेर्न सक्नेछन्।

आन्तरिक राजस्व विभागले योग्य कारोबारका आधारमा नियमित लक्की ड्र सञ्चालन गर्ने व्यवस्था गरेको छ। यसअन्तर्गत हरेक दिन एक जना विजेताले कर कट्टापश्चात १ लाख रुपैयाँ नगद पुरस्कार प्राप्त गर्नेछन् भने प्रत्येक १५ दिनमा एक जना बम्पर विजेताले १० लाख रुपैयाँ नगद पुरस्कार जित्ने अवसर पाउनेछन्।

बैंकले आफ्ना ग्राहकलाई १०० रुपैयाँभन्दा माथिको प्रत्येक खरिदमा डिजिटल भुक्तानी गर्न, अनिवार्य रूपमा भ्याट बिल लिन, बिल सुरक्षित राख्न तथा एमबीएल एम–स्मार्ट एपमार्फत योग्य कारोबार नियमित रूपमा जाँच गर्न आग्रह गरेको छ।

माछापुच्छ्रे बैंकले डिजिटल बैंकिङ सेवालाई अझ सहज, सुरक्षित र ग्राहकमैत्री बनाउने आफ्नो प्रतिबद्धता दोहोर्याउँदै सरकारी डिजिटल भुक्तानी तथा कर सचेतना अभियानमा निरन्तर सहकार्य गर्ने जनाएको छ। साथै “डिजिटल भुक्तानी गरौं, बिल लिऔं, सुरक्षित राखौं र १० लाख रुपैयाँसम्मको उपहार जित्ने अवसर नछुटाऔं” भन्ने सन्देशसहित कार्यक्रममा सक्रिय सहभागिताका लागि ग्राहकलाई आह्वान गरेको छ।