सेतो खबर
काठमाडौं । एनएमबि बैंक लिमिटेडले नेपाल र भारतबीच सहज, सुरक्षित तथा छिटो रकम आदानप्रदान गर्न सकिने नयाँ ‘इन्डो–नेपाल क्रस–बोर्डर रेमिट्यान्स’ सेवा सञ्चालनमा ल्याएको छ। नेपाल क्लियरिङ हाउस लिमिटेड (एनसीएचएल) सँगको सहकार्यमा सुरु गरिएको यस सेवामार्फत ग्राहकहरूले अब दुवै देशबीचको रकम कारोबार अझ सरल र प्रभावकारी रूपमा गर्न सक्ने बैंकले जनाएको छ।
बैंकका अनुसार नयाँ सेवाले परम्परागत रेमिट्यान्स प्रक्रियामा हुने झन्झट र ढिलाइलाई न्यूनीकरण गर्नेछ। भारतबाट पठाइएको रकम एनएमबि बैंकमा रहेको ग्राहकको व्यक्तिगत खातामा तुरुन्तै जम्मा हुने व्यवस्था गरिएको छ, जसले रकम प्राप्तिका लागि दिनौंसम्म पर्खिनुपर्ने अवस्थाको अन्त्य गर्ने अपेक्षा गरिएको छ।
यस सेवाको अर्को विशेषता भनेको ग्राहकलाई उपलब्ध गराइने भर्चुअल पेमेन्ट एड्रेस (VPA) हो। लामो बैंक खाता नम्बर साझा गर्नुपर्ने झन्झटबाट मुक्त गराउँदै बैंकले प्रत्येक ग्राहकलाई छुट्टै भर्चुअल ठेगाना प्रदान गर्नेछ, जसको माध्यमबाट सहज रूपमा रकम पठाउन र प्राप्त गर्न सकिनेछ।
बैंकले सेवाको पहुँचलाई थप व्यापक बनाउन मोबाइल बैंकिङ एप, बैंकको आधिकारिक वेबसाइट तथा देशभरका शाखामार्फत समेत सेवा उपलब्ध गराएको जनाएको छ। ग्राहकहरूले आफैं डिजिटल माध्यमबाट सेवा सक्रिय गर्न सक्नेछन् भने आवश्यक परे शाखामा गएर कर्मचारीको सहयोगमा पनि सेवा सञ्चालन गर्न सक्ने व्यवस्था गरिएको छ।
घरायसी खर्च तथा व्यक्तिगत प्रयोजनका लागि भारतबाट रकम प्राप्त गर्नुपर्ने ग्राहकहरूलाई यो सेवा विशेष रूपमा उपयोगी हुने बैंकको विश्वास छ। साथै, ग्राहकको रकमको सुरक्षा सुनिश्चित गर्न बैंकको आन्तरिक प्रणालीमार्फत निरन्तर निगरानी तथा सुरक्षा व्यवस्थासमेत गरिएको जनाएको छ।
हाल एनएमबि बैंकले देशभर फैलिएका १९८ शाखा, १७६ एटीएम तथा ९ एक्सटेन्सन काउन्टरमार्फत बैंकिङ सेवा प्रदान गर्दै आएको छ। नयाँ क्रस–बोर्डर रेमिट्यान्स सेवाले नेपाल–भारतबीचको वित्तीय कारोबारलाई थप आधुनिक, सुरक्षित र सहज बनाउने अपेक्षा गरिएको छ।
काठमाडौं । भावी प्रधानन्यायाधीश नियुक्तिका लागि सिफारिस गर्ने उद्देश्यले आज संवैधानिक परिषद्को बैठक बस्दैछ। परिषद्का अध्यक्ष तथा प्रधानमन्त्री बालेन्द्र शाह... विस्तृतमा
