सेतो खबर
काठमाडौं ।बुढानीलकण्ठ नगरपालिका–१३, चुनिखेलस्थित पिक प्वाईन्ट एजुकेशन नेटवर्कले माध्यमिक शिक्षा परीक्षा (एसईई) २०८३ मा उत्कृष्ट नतिजा हासिल गर्दै आफ्नो शैक्षिक उत्कृष्टताको परम्परालाई निरन्तरता दिएको छ। यस वर्ष विद्यालयका ९ जना विद्यार्थीले सर्वोत्कृष्ट ४.० जीपीए हासिल गरेका छन् भने सहभागी सबै ६८ जना विद्यार्थी उत्तीर्ण भएका छन्।
उत्कृष्ट नतिजा हासिल गरेका विद्यार्थीहरूको सम्मान तथा बिदाइ गर्न शनिबार काठमाडौंको सुकुन्दा बैंक्वेटमा भव्य ‘फेलिसिटेसन एन्ड फेयरवेल प्रोग्राम २०८३’ आयोजना गरिएको थियो। कार्यक्रममा विद्यार्थीसँगै उनीहरूका अभिभावक, शिक्षक तथा विद्यालय व्यवस्थापनका प्रतिनिधिहरूको उल्लेखनीय सहभागिता रहेको थियो।
विद्यालयका अनुसार यस वर्ष एसईई परीक्षामा सहभागी ६८ जना विद्यार्थीमध्ये ६६ जनाले ३.६ देखि ४.० जीपीएसम्म प्राप्त गरेका छन् भने बाँकी २ जनाले ३.२ देखि ३.६ जीपीए हासिल गरेका छन्। विद्यालयले लगातार कायम राख्दै आएको ‘शून्य अनुत्तीर्ण’ को इतिहास यस वर्ष पनि कायम रहन सफल भएको छ।
यस वर्ष ४.० जीपीए प्राप्त गर्ने विद्यार्थीहरूमा विविधि सिलवाल, दिशा आङ्देम्बे, रुपेन परियार, सजन दाहाल, यूसन राई, प्रजिन पौडेल, विपासना गौतम, साहाल भट्टराई र गौतम गुरुङ रहेका छन्। उनीहरूको उत्कृष्ट सफलताले विद्यालयलाई मात्र नभई सम्पूर्ण बुढानीलकण्ठ क्षेत्रलाई गौरवान्वित बनाएको विद्यालयले जनाएको छ।
कार्यक्रममा बोल्दै विद्यालयका प्रधानाध्यापक बिनय श्रेष्ठले उत्कृष्ट नतिजा कुनै एक व्यक्तिको प्रयासबाट सम्भव नभएको उल्लेख गर्दै विद्यार्थी, शिक्षक र अभिभावकबीचको सहकार्य नै सफलताको मुख्य आधार भएको बताउनुभयो।
“विद्यार्थीहरूको मेहनत, शिक्षकहरूको समर्पण र अभिभावकहरूको निरन्तर सहयोगका कारण हामीले यो उपलब्धि हासिल गरेका हौं। यो सफलता केवल विद्यालयको मात्र नभई सम्पूर्ण समुदायको गर्वको विषय हो,” उहाँले भन्नुभयो।
सह–प्रधानाध्यापक महेश केसीले पिक प्वाईन्टले हासिल गरेको सफलता चुनिखेल क्षेत्रका लागि प्रेरणादायी उदाहरण बनेको बताउनुभयो। उहाँले आगामी दिनमा विद्यालयले अझ उच्च शैक्षिक उपलब्धि हासिल गर्ने लक्ष्यसहित गुणस्तरीय शिक्षामा जोड दिने प्रतिबद्धता व्यक्त गर्नुभयो।
“उत्कृष्ट नतिजाले हामीमाथि थप जिम्मेवारी बढाएको छ। विद्यार्थीहरूको क्षमता विकास, व्यवहारिक शिक्षा र प्रतिस्पर्धात्मक दक्षता अभिवृद्धिका लागि आगामी दिनमा अझ प्रभावकारी कार्यक्रम सञ्चालन गर्नेछौं,” उहाँले भन्नुभयो।
कार्यक्रमका अवसरमा एसईई तयारीमा महत्वपूर्ण योगदान पुर्याएका कक्षा १० का सम्पूर्ण शिक्षकहरूलाई सम्मानपत्र तथा मायाको चिनो प्रदान गरिएको थियो। विद्यालयले उत्कृष्ट नतिजा हासिल गरेका विद्यार्थी र उनीहरूका अभिभावकलाई समेत विशेष सम्मान गरेको थियो।
वि.सं. २०६० सालमा स्थापना भएको पिक प्वाईन्ट एजुकेशन नेटवर्कले २०७० सालदेखि एसएलसी (हाल एसईई) परीक्षामा सहभागिता जनाउँदै आएको छ। विद्यालयले सुरुदेखि नै उत्कृष्ट नतिजा हासिल गर्दै आएको छ भने हालसम्म विद्यालयबाट एसईई परीक्षा दिएका कुनै पनि विद्यार्थी अनुत्तीर्ण भएका छैनन्।
यसैबीच, बुढानीलकण्ठ नगरपालिकाभित्र रहेका ११३ संस्थागत र १९ सामुदायिक विद्यालयमध्ये एसईई २०८३ को नतिजाका आधारमा पिक प्वाईन्ट एजुकेशन नेटवर्क दोस्रो स्थानमा पर्न सफल भएको जनाएको छ। नगरस्तरमा प्राप्त यो उपलब्धिलाई विद्यालयले आफ्नो शैक्षिक यात्राको अर्को महत्वपूर्ण कोशेढुंगाको रूपमा लिएको छ।
हाल पिक प्वाईन्ट एजुकेशन नेटवर्क अन्तर्गत पिक प्वाईन्ट एकेडेमी, पिक प्वाईन्ट पब्लिक स्कुल र हार्मोनी प्रोग्रेसिभ स्कुल सञ्चालनमा रहेका छन्। यी संस्थामार्फत नेटवर्कले काठमाडौं उपत्यकामा गुणस्तरीय, अनुशासित र परिणाममुखी शिक्षाको प्रवर्द्धन गर्दै आएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
