एमालेका विद्यार्थीहरुले काठमाडौंमा जलाए रास्वपाको वरिष्ठ नेता बालेनको पुत्ला

काठमाडौं । अनेरास्ववियुले दाङमा पार्टीको ‘सूर्य’ चिन्ह अंकित झण्डा जलाइएको घटनाको विरोधमा काठमाडौंमा मसाल जुलुस निकालेको छ। विरोध प्रदर्शनका क्रममा उनीहरूले राष्ट्रिय स्वतन्त्र पार्टी (रास्वपा)का वरिष्ठ नेता बालेन शाहको पुत्ला दहन गरेका छन्।

अनेरास्ववियुले आरआर क्याम्पस परिसरबाट जुलुस सुरु गरेको थियो। प्रदर्शनकारीहरूले उक्त घटना लोकतान्त्रिक अभ्यास, राजनीतिक सहिष्णुता तथा सामाजिक सद्भावमाथि असर पार्ने गतिविधि भएको भन्दै कडा आपत्ति जनाएका छन्।

नेकपा एमालेले आफ्नो झण्डा जलाउने कार्यमा रास्वपाका नेता तथा कार्यकर्ता संलग्न रहेको आरोप लगाएको छ। तर रास्वपाले उक्त आरोप अस्वीकार गर्दै घटनामा आफ्नो कुनै संलग्नता नरहेको स्पष्ट पारेको छ।

अनेरास्ववियुले घटनाको निष्पक्ष छानबिन गरी दोषीमाथि कानुनी कारबाही गर्न सरकारसँग माग गरेको छ। घटनापछि राजधानीको राजनीतिक वातावरण केही तनावपूर्ण बनेको छ।