सेतो खबर
काठमाडौं। निर्वाचन प्रहरीका लागि कपडा खरिदमा अनियमितताको प्रश्न उठेपछि संसद्को सार्वजनिक लेखा समितिले अध्ययन समिति गठन गरेको छ।
शुक्रबार बसेको लेखा समितिको बैठकले राष्ट्रिय स्वतन्त्र पार्टी (रास्वपा)का सांसद मनिष झाको नेतृत्वमा नौ सदस्यीय अध्ययन समिति गठन गरेको हो।
images
समितिमा ऐन महर, योगेश गौचन थकाली, आरेन राई, खगेन्द्र सुनार, खुश्बु ओली, रमेशकुमार मल्ल, गणेश धिमाल र महेन्द्रबहादुर शाही सदस्य छन्।
अध्ययन समितिले दुई महिनाभित्र प्रतिवेदन तयार गरी लेखा समितिसमक्ष बुझाउनुपर्नेछ।
निर्वाचन प्रहरीको पोसाक खरिदमा ६० करोड हिनामिना भएको भन्दै लेखा समितिमा उजुरी परेको थियो ।
सोही उजुरीका आधारमा प्रतिनिधिसभाअन्तर्गतको सार्वजनिक लेखा समितिको बैठकमा उजुरीमाथि छलफल भएको थियो।
बैठकमा सत्तारुढ दल राष्ट्रिय स्वतन्त्र पार्टीका सांसद खगेन्द्र सुनारले प्रहरी प्रधान कार्यालयको निर्देशनमा जिल्लाका कमाण्डर र लेखापालहरूले गर्ने काममा पारदर्शिता नभएको र प्रहरी सेवाबाट अवकाशप्राप्त लेखापालहरू नै ठेकेदार बनेर प्रहरीभित्रै सक्रिय रहेर प्रहरी प्रशासनभित्र अनियमितता मौलाएको आरोप लगाएका थिए ।
साथै सांसद सुनारले बैठकमा प्रहरी महानिरीक्षकमाथि प्रश्न उठिसकेकोले पदबाट हटाए छानबिन गर्नुपर्ने माग राखेका थिए ।
छलफलमा गृह मन्त्रालयका सचिव राजकुमार श्रेष्ठ, नेपाली प्रहरीका प्रहरी महानिरीक्षक (आईजीपी)दानबहादुर कार्की, सशस्त्र प्रहरी महानिरीक्षक (आईजीपी) नारायणदत्त पौडेल उपस्थित थिए ।
खरिद प्रकरणमा प्रश्न उठिसक्दा पनि लेखा समितिले प्रभावकारी रूपमा चासो नदिएको भन्दै अर्को बैठकमा सांसद सुनारले फेरी कडा असन्तुष्टि जनाएका थिए।
उनले सम्बन्धित कागजात १५ दिनभित्र उपलब्ध गराउन माग गरिएको भए पनि फाइल प्राप्त भयो कि भएन भन्ने सामान्य जानकारीसमेत समितिका सदस्यलाई नदिइएको भन्दै प्रश्न पनि उठाएका थिए।
सुनारले निर्वाचन प्रहरीका लागि कपडा खरिदजस्तो सार्वजनिक चासोको विषयमा समितिको कामकारबाही सुस्त देखिएको भन्दै आवश्यक कागजात तत्काल झिकाएर अध्ययन तथा छानबिन अघि बढाउनुपर्नेमा जोड दिएका थिए।
तर, निर्वाचन प्रहरीका लागि कपडा खरिदमा अनियमितताको प्रश्न उठेपछि लेखा समितिभित्रै छानबिन गर्ने कि अध्ययन समिति बनाउने भन्ने विषयमा सांसदहरूबीच मतभेद देखिएको थियो। अन्ततः समितिले अध्ययन समिति गठन गर्ने निर्णय गरेको हो।
कपडा खरिदमा उठेको अनियमितताको प्रश्न, माग गरिएका कागजातको अवस्था र खरिद प्रक्रियामा भएका निर्णयबारे अध्ययन समितिले तथ्य तथा कागजातका आधारमा प्रतिवेदन तयार गर्नेछ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
