बालेन सरकार विघटन गरी ‘नयाँ सरकार’ गठन गर्न जेनजी मुभमेन्टको माग

काठमाडौं । जेनजी मुभमेन्ट नेपालले प्रधानमन्त्री बालेन्द्र शाह नेतृत्वको वर्तमान सरकार तत्काल विघटन गरी प्रतिनिधिसभाबाटै अर्को सरकार गठन गर्न माग गरेको छ।

मुभमेन्टका प्रवक्ता विजय शाहले सोमबार जारी गरेको प्रेस वक्तव्यमा सरकारसँग जोडिएका विभिन्न गम्भीर प्रश्नमाथि निष्पक्ष र स्वतन्त्र छानबिन आवश्यक रहेको उल्लेख गर्दै वर्तमान सरकारबाटै त्यस्तो अनुसन्धान सम्भव नरहेको दाबी गरिएको छ।

मुभमेन्टले प्रतिनिधिसभाको आकस्मिक बैठक बोलाएर वर्तमान सरकार विघटन गरी सोही संसद्बाट अर्को सरकार गठन गर्नुपर्ने माग गरेको हो। यस्तो कदमलाई आफूहरूले ‘शान्तिपूर्ण र संवैधानिक राजनीतिक निकास’का रूपमा लिएको वक्तव्यमा उल्लेख छ।

वक्तव्यमा प्रधानमन्त्री बालेन्द्र शाह, रवि लामिछाने, सुधन गुरुङ र सागर ढकाललगायत व्यक्तिहरूमाथि उठेका विदेशी प्रभाव, हिंसा तथा सत्ता परिवर्तनसम्बन्धी प्रश्नको निष्पक्ष छानबिन गर्नुपर्ने माग गरिएको छ।

त्यस्तै, हालै सार्वजनिक भएको भनिएको द ग्रे जोनको रिपोर्टमा उद्धृत कागजातमा नेपालमा विदेशी आर्थिक तथा राजनीतिक कार्यक्रममार्फत केही व्यक्तिलाई प्रभावशाली नागरिक नेतृत्वका रूपमा अघि बढाउने योजनाबारे गरिएको दाबीको सत्यता तत्काल स्वतन्त्र रूपमा परीक्षण गर्नुपर्ने मुभमेन्टको भनाइ छ।

जेनजी आन्दोलनका क्रममा भएको हिंसा, आगजनी, सिंहदरबारलगायत राज्यका संरचनामाथिको आक्रमण, जेल फोड्ने घटना तथा जनधनको क्षतिबारे पनि निष्पक्ष छानबिन हुनुपर्ने मुभमेन्टले जनाएको छ।

मानव अधिकार आयोगको प्रतिवेदनले आन्दोलनका क्रममा युवालाई भिडन्त र द्वन्द्वतर्फ धकेलिएको तथा राज्य संयन्त्रमा गम्भीर अव्यवस्था सिर्जना भएको विषय सार्वजनिक गरेको दाबी गर्दै मुभमेन्टले आन्दोलनको नेतृत्व र हिंसात्मक घटनासँग जोडिएका व्यक्तिहरूको भूमिकामाथि समेत अनुसन्धान आवश्यक रहेको जनाएको छ।

मुभमेन्टले नेपाली सेना, अन्य सुरक्षा निकाय, सर्वोच्च अदालत तथा निजामती प्रशासनलाई वर्तमान परिस्थितिमा संवेदनशील भएर आफ्नो संवैधानिक भूमिका निर्वाह गर्न आग्रह गरेको छ।

प्रतिनिधिसभाले संवैधानिक निकास दिन नसके जनताको असन्तुष्टि व्यापक राजनीतिक प्रतिरोधमा परिणत हुन सक्ने चेतावनी दिँदै मुभमेन्टले आफूहरू हिंसा र प्रतिशोधको पक्षमा नरहेको स्पष्ट पारेको छ।

‘हामी संघर्ष चाहँदैनौँ, अराजकता चाहँदैनौँ र हिंसा चाहँदैनौँ। तर अन्याय, दण्डहीनता र विदेशी प्रभावको आरोपलाई ढाकछोप गरेर देशलाई अनिश्चिततातर्फ धकेल्ने प्रवृत्ति स्वीकार्य हुँदैन,’ वक्तव्यमा भनिएको छ।

नेपालको सत्ता नेपाली जनताको जनादेशबाट सञ्चालन हुनुपर्ने र कुनै पनि विदेशी स्वार्थको प्रभावमा मुलुकको राजनीतिक निर्णय हुन नहुनेमा मुभमेन्टले जोड दिएको छ।