सेतो खबर
काठमाडौं । राष्ट्रिय स्वतन्त्र पार्टी (रास्वपा)का सांसद अमरेशकुमार सिंहले अख्तियार दुरुपयोग अनुसन्धान आयोग प्रधानमन्त्रीको मातहतमा नरहेको बताएका छन्।
बिहीबार संसद्को राज्य व्यवस्था तथा सुशासन समितिको बैठकमा बोल्दै सिंहले संवैधानिक निकायका रूपमा रहेको अख्तियारको संस्थागत स्वतन्त्रता र स्वायत्तता कायम राख्नुपर्ने बताए।
उनले प्रधानमन्त्री वा मन्त्रीले बोलाउँदैमा अख्तियारका पदाधिकारीहरू भेट्न जान नहुने धारणा राखे। “अख्तियार प्रधानमन्त्री मातहतको संस्था होइन। त्यसैले अख्तियारका पदाधिकारीहरू कुनै मन्त्री वा प्रधानमन्त्रीले बोलाउँदैमा त्यहाँ धाउनु हुँदैन। अख्तियारको मर्यादा दिनप्रतिदिन समाप्त हुँदै गएको छ,” उनले भने।
सरकारका कामकारबाहीमा निगरानी, नियन्त्रण र सन्तुलन कायम गर्न संवैधानिक रूपमा स्थापित अख्तियारको भूमिका महत्वपूर्ण रहेको भन्दै सिंहले आयोगको संस्थागत स्वायत्ततामा कुनै किसिमको प्रश्न उठ्ने अवस्था सिर्जना गर्न नहुने बताए।
गत असारको पहिलो साता अख्तियारका पदाधिकारीहरू प्रधानमन्त्री तथा मन्त्रिपरिषद्को कार्यालय पुगेको घटनालाई लिएर प्रश्न उठिरहेका बेला सिंहले यस्तो धारणा राखेका हुन्।
उक्त घटनामा प्रधानमन्त्री वालेन्द्र शाहका सहयोगीहरूले अख्तियारका पदाधिकारीलाई लामो समय कार्यालयमा राखेर सोधपुछ गरेको दाबी सार्वजनिक भएपछि आयोगको स्वतन्त्रता र कार्यपालिकासँगको सम्बन्धबारे बहस भएको थियो।
सिंहले सोही घटनालाई संकेत गर्दै अख्तियारमाथि कार्यपालिकाको प्रभाव परेको आशंका उत्पन्न हुने गतिविधि रोक्न सरकार र सम्बन्धित निकाय गम्भीर हुनुपर्ने बताए।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
