सेतो खबर
काठमाडौं । देशमै पहिलोपटक ‘डिजिटल फेस्ट’को अवधारणासहित राष्ट्रिय घर निर्माण फेस्ट–२०८३ आयोजना हुने भएको छ। घर निर्माण फेस्टसँगै सञ्चालन हुने डिजिटल फेस्टका लागि काठमाडौंको भृकुटीमण्डपमा छुट्टै मल्टिपर्पोज स्टुडियो निर्माण गरिने भएको छ।
यस वर्षको राष्ट्रिय घर निर्माण फेस्ट–२०८३ आगामी पुस ९ देखि १२ गतेसम्म आयोजना हुनेछ। फेस्टमा घर निर्माणसँग सम्बन्धित निर्माण सामग्री, प्रविधि, सेवा तथा विभिन्न कम्पनीका उत्पादनलाई एउटै प्लेटफर्ममा प्रदर्शन गरिने आयोजकले जनाएको छ।
डिजिटल फेस्टका लागि निर्माण गरिने मल्टिपर्पोज स्टुडियोमार्फत प्रदर्शनीमा सहभागी ब्रान्ड, कम्पनी तथा संस्थाले आफ्ना उत्पादन र सेवाबारे जानकारी तथा विज्ञापन प्रस्तुत गर्न सक्नेछन्। स्टुडियोबाट तयार गरिएका सामग्री राष्ट्रिय टेलिभिजन तथा आयोजकका सामाजिक सञ्जालमार्फत प्रत्यक्ष प्रसारण गर्ने व्यवस्था मिलाइने भएको छ।
आयोजकका अनुसार डिजिटल फेस्टको मुख्य उद्देश्य प्रदर्शनीलाई भौतिक उपस्थितिमा मात्र सीमित नराखी काठमाडौं बाहिरका दर्शक तथा अन्तर्राष्ट्रिय पहुँच भएका उपभोक्तासम्म पुर्याउनु हो। यसबाट नेपाली उत्पादन तथा निर्माण क्षेत्रमा आबद्ध कम्पनी र सेवाको अन्तर्राष्ट्रिय प्रवद्र्धनमा समेत सहयोग पुग्ने अपेक्षा गरिएको छ।
पछिल्ला वर्षमा प्रविधिको प्रयोग र सामाजिक सञ्जालको प्रभाव बढ्दै गएको तथा कन्टेन्ट मार्केटिङको स्वरूपमा समेत परिवर्तन आएको अवस्थामा घर निर्माण फेस्टलाई डिजिटल माध्यमसँग जोड्न लागिएको आयोजकको भनाइ छ। यसले नेपालबाहिर रहेका नेपाली तथा सम्भावित ग्राहकलाई समेत निर्माण क्षेत्रको ठूलो मेलासँग प्रत्यक्ष जोड्न सहयोग पुग्ने विश्वास गरिएको छ।
अघिल्लो वर्ष १५० वटा स्टल राखिएकोमा यसपटक २०० भन्दा बढी स्टल राख्ने तयारी गरिएको छ। घर निर्माण फाउन्डेसनका अनुसार हालसम्म करिब ६० प्रतिशत स्टल बुकिङ भइसकेको छ।
यसअघि सम्पन्न राष्ट्रिय घर निर्माण फेस्ट–२०८२ को दोस्रो संस्करणमा ६० हजारभन्दा बढी दर्शकले प्रदर्शनी अवलोकन गरेका थिए। नयाँ स्वरूपमा आयोजना गर्न लागिएको यस वर्षको फेस्टमा दर्शकको संख्या उल्लेख्य रूपमा बढ्ने आयोजकको अनुमान छ। साथै, फेस्टका क्रममा हुने कारोबारलाई ४ अर्ब रुपैयाँभन्दा बढी पुर्याउने लक्ष्य राखिएको छ।
घर निर्माणका लागि आवश्यक निर्माण सामग्री, प्रविधि र सेवाबारे सर्वसाधारणलाई एकै स्थानबाट जानकारी उपलब्ध गराउने उद्देश्यले आयोजना गर्न लागिएको फेस्टमा ट्राइनोक्स ग्लोबलले सहकार्य गरेको छ।
फेस्टले घर निर्माणको योजना बनाइरहेका सर्वसाधारणदेखि निर्माण व्यवसायी, इन्जिनियर, आर्किटेक्ट, विद्यार्थी तथा निर्माण क्षेत्रसँग सम्बन्धित अन्य सरोकारवालालाई एउटै प्लेटफर्ममा ल्याउने आयोजकको अपेक्षा छ।
घर निर्माण फाउन्डेसनका अनुसार नेपालमा निर्माण तथा व्यावसायिक गतिविधि विस्तार हुँदै गए पनि धेरै ब्रान्डले आफ्नो पहिचान प्रभावकारी रूपमा प्रस्तुत गर्न, ग्राहकसँग सम्बन्ध विस्तार गर्न तथा उत्पादन र सेवाको व्यवस्थित एवं आकर्षक प्रदर्शन गर्न चुनौती सामना गरिरहेका छन्। यिनै चुनौतीलाई सम्बोधन गर्ने उद्देश्यले फेस्ट आयोजना गर्न लागिएको हो।
आयोजकका अनुसार गत वर्षको प्रदर्शनीमा सहभागी विभिन्न व्यवसायीले कुल साढे ३ अर्ब रुपैयाँभन्दा बढीको कारोबार गरेका थिए। यसपटक डिजिटल फेस्टसमेत जोडिएकाले प्रदर्शनीको पहुँच र व्यापारिक गतिविधि थप विस्तार हुने अपेक्षा गरिएको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
