प्रधानमन्त्री शाह र प्रधानसेनापति सिग्देलबीच भेटवार्ता

प्रधानमन्त्री वालेन्द्र शाह (बालेन) र प्रधानसेनापति अशोकराज सिग्देलबीच भेटवार्ता भएको छ ।

शुक्रबार मध्यान्ह प्रधानमन्त्री तथा मन्त्रिपरिषद्को कार्यालयमा प्रधानमन्त्री शाह र प्रधानसेनापति सिग्देलबीच छोटो भेट भएको प्रधानमन्त्री सचिवालय स्रोतले जनाएको छ ।

भेटमा के विषयमा छलफल भयो भन्नेबारे भने प्रधानमन्त्री कार्यालय र नेपाली सेनाले औपचारिक जानकारी दिएका छैनन् । नेपाली सेनाका प्रवक्ता सहायक रथी राजाराम बस्नेतले पनि भेटको विषयबारे आफूलाई जानकारी नभएको बताएका छन् ।

नेपाली सेनाले भने प्रधानमन्त्री र प्रधानसेनापतिबीचको भेटलाई नियमित भेटका रूपमा व्याख्या गरेको छ । यद्यपि, रक्षा मन्त्रालयको जिम्मेवारीसमेत सम्हालिरहेका प्रधानमन्त्री शाह र प्रधानसेनापति सिग्देलबीचको भेट भएकाले सुरक्षा तथा समसामयिक विषयमा छलफल भएको हुनसक्ने अनुमान गरिएको छ ।

प्रधानमन्त्री शाह र प्रधानसेनापति सिग्देलबीच यसअघि पनि भेटवार्ता भएको थियो । साउन १९ गते भएको भेटमा गोकर्णस्थित नेपाल ट्रस्टको जग्गामा सैनिक अधिकारीको असहमतिबीच रास्वपा सांसद राजु पाण्डेको नेतृत्वमा डोजर चलाइएको विषयमा छलफल भएको बताइएको थियो ।

सैनिक अधिकारीको अवरोधका बाबजुद डोजर चलाइएको घटनाप्रति प्रधानसेनापति सिग्देलले असन्तुष्टि व्यक्त गरेको स्रोतको दाबी थियो । उक्त भेटपछि सांसद पाण्डेले घटनाबारे स्पष्टीकरणसमेत दिएका थिए ।

शुक्रबारको भेट भने छोटो र नियमित प्रकृतिको रहेको बताइएको छ । भेटको आधिकारिक विषयवस्तु सार्वजनिक नभएकाले छलफलका एजेन्डाबारे यकिन जानकारी बाहिर आएको छैन।