गगन थापा भन्छन्- सरकारका मन्त्रीहरू ‘छोटे राजा’को शैलीमा देखिन थाले

काठमाडौं । नेपाली कांग्रेसका सभापति गगन थापाले सरकारमा रहेका मन्त्रीहरूको भाषा र व्यवहारमा ‘छोटे राजा’को शैली देखिन थालेको बताएका छन्।

आइतबार पार्टी कार्यालयमा सुरु भएको कांग्रेस केन्द्रीय कार्यसमिति बैठकमा बोल्दै थापाले मन्त्रीहरूबाट हरेक दिनजसो ‘खुट्टा भाँचिदिन्छु’, ‘थुन्दिन्छु’ जस्ता अभिव्यक्ति आउनु सरकारमा ‘छोटे राजा’ शैली देखिन थालेको संकेत भएको बताए।

यस्तो प्रवृत्तिलाई खबरदारी गर्दै सरकारलाई सही बाटोमा ल्याउनु कांग्रेसको जिम्मेवारी भएको उनको भनाइ छ। संसद्मा कांग्रेस प्रमुख प्रतिपक्षी दल भएकाले सरकारलाई जिम्मेवार बनाउने दायित्व कांग्रेसकै रहेको उनले बताए।

थापाले २३ र २४ भदौका घटनालाई अचानक भएको घटनाका रूपमा मात्रै बुझ्न नहुने बताए। त्यसअघि २०८१, २०८० र २०७९ सालदेखि नै राजनीतिक दलहरूको गति र कार्यशैलीमाथि प्रश्न उठ्दै आएको उनको भनाइ थियो।

उनले २१ फागुन २०८२ मा भएको प्रतिनिधिसभा निर्वाचनमा असन्तुष्ट मतदाताले ब्यालेटमार्फत कांग्रेसलाई प्रतिपक्षमा पुर्‍याएको बताए। आफ्नै वरिष्ठ नेता अर्जुननरसिंह केसीले नेपालमा जुनसुकै बेला बंगलादेशको जस्तो अवस्था आउन सक्ने चेतावनी दिएको स्मरण गर्दै थापाले अझै पनि राजनीतिक दलहरूको ‘गति र मति’ नसुध्रिएको बताए।

रास्वपाले २१ फागुनमा ब्यालेटमार्फत ल्याएको परिवर्तनलाई कांग्रेसले सम्मान गर्ने बताउँदै उनले जनताले परिवर्तनको अनुभूति गर्न नसकेकोप्रति भने असन्तुष्टि जनाए।

सरकार गठन भएको १०० दिनसम्म कांग्रेसले ‘हनिमुन पिरियड’का रूपमा हेरेर आवश्यक सहयोग गरेको उल्लेख गर्दै थापाले सरकारको गति ठीक नभएको भन्दै प्रश्न गर्दा प्रधानमन्त्रीले आफूहरू ‘एक्सप्रेस गाडी’ भएको जवाफ दिएको बताए।

तर ‘एक्सप्रेस गाडी’ भए पनि ‘एक्सप्रेस वे’मा लेन मिच्न नदिइने भन्दै थापाले सरकारलाई संवैधानिक सीमा र कानुनी प्रक्रियाभित्र रहेर काम गर्न चेतावनी दिए।

बैठकमा उनले बीपी कोइरालाको भनाइ उद्धृत गर्दै राष्ट्रिय संकटका बेला कांग्रेस चुप लागेर बस्न नहुने बताए। पार्टीभित्र मात्रै नभई पार्टी बाहिर पनि संकट समाधानका लागि कांग्रेस सक्रिय हुनुपर्ने उनको भनाइ थियो।

थापाले कांग्रेस प्रतिपक्षमा हुनु जनताले दिएको संवैधानिक जिम्मेवारी भएको बताए। सरकारलाई प्रश्न गर्ने, खबरदारी गर्ने र जिम्मेवार बनाउने काम कांग्रेसले गर्नुपर्ने उनले बताए।

सरकारलाई शासकीय अराजकताको छुट नभएको भन्दै थापाले संवैधानिक निकायका पदाधिकारीलाई प्रधानमन्त्री कार्यालयमा ल्याएर थुन्ने वा प्रधानन्यायाधीशमाथि दबाब दिने जस्ता गतिविधि गलत भएको बताए।

उनले २०४६ सालपछिका सबै नेताको सम्पत्ति छानबिन गर्ने बताउने सरकारले आफ्नै मन्त्रीहरूको सम्पत्तिमाथि भएको छानबिनको प्रतिवेदन सार्वजनिक गर्नुपर्ने मागसमेत गरे।