सेतो खबर
काठमाडौं । प्रभु बैंक लिमिटेडले पछिल्ला केही दिनयता विभिन्न सञ्चारमाध्यममा बैंक, सञ्चालक समिति, पदाधिकारी तथा व्यवस्थापनसँग सम्बन्धित विषयमा प्रकाशित र प्रसारित भएका समाचारप्रति गम्भीर ध्यानाकर्षण भएको जनाएको छ। बैंकले मंगलबार विस्तृत प्रेस विज्ञप्ति जारी गर्दै तथ्य र आधिकारिक पुष्टिबिना प्रकाशित भएका सामग्री भ्रामक, आधारहीन तथा एकपक्षीय रहेको दाबी गर्दै त्यसको खण्डन गरेको हो।
बैंकले विज्ञप्तिमार्फत यस्ता समाचारले संस्थाको प्रतिष्ठामा आँच पुर्याउनुका साथै सञ्चालक तथा पदाधिकारीहरूको व्यक्तिगत मान–मर्यादा, बैंकिङ क्षेत्रप्रतिको सार्वजनिक विश्वास तथा समग्र वित्तीय प्रणालीमा समेत अनावश्यक भ्रम सिर्जना गरेको जनाएको छ। कुनै पनि सूचना वा समाचार प्रकाशित गर्नुअघि सम्बन्धित पक्षसँग आधिकारिक पुष्टि गर्नु सञ्चारमाध्यमको व्यावसायिक दायित्व भएको बैंकले स्मरण गराएको छ।
प्रभु बैंकले कर्मचारी सरुवा, कार्य जिम्मेवारीमा आवश्यक समायोजन, आन्तरिक व्यवस्थापन, कर्जा असुली प्रक्रिया तथा धितो लिलामीसम्बन्धी सूचना प्रकाशनजस्ता गतिविधि बैंकिङ व्यवसायका नियमित, कानुनसम्मत तथा संस्थागत प्रक्रिया भएको स्पष्ट पारेको छ।
यस्ता नियमित प्रशासनिक तथा व्यवस्थापकीय कार्यलाई नकारात्मक अर्थ लगाएर तथ्य, प्रमाण वा आधिकारिक पुष्टि बिना समाचार प्रकाशन तथा प्रसारण गर्नु पत्रकारिताको व्यावसायिक आचारसंहिता र जिम्मेवार सञ्चार अभ्यासअनुकूल नरहेको बैंकको भनाइ छ।
विज्ञप्तिमा केही कर्जा फाइलसँग सम्बन्धित विषयमा अधिकारप्राप्त निकायबाट अनुसन्धान भइरहेको र केही मुद्दा अदालतमा विचाराधीन रहेको उल्लेख गरिएको छ। यद्यपि, बैंकले नेपाल राष्ट्र बैंकका निर्देशन, प्रचलित कानुन तथा नियामकीय व्यवस्थाअनुसार जोखिम व्यवस्थापन, आन्तरिक निगरानी तथा सुधारात्मक उपायहरू प्रभावकारी रूपमा कार्यान्वयन गरिरहेको जनाएको छ।
यस्ता घटनाबाट सिक्दै भविष्यमा कुनै पनि कमजोरी दोहोरिन नदिन थप सुदृढ नियन्त्रण प्रणाली लागू गर्ने प्रतिबद्धता समेत बैंकले व्यक्त गरेको छ।
प्रभु बैंकले सञ्चालक समिति तथा व्यवस्थापनबाट गरिने सम्पूर्ण निर्णय सम्बन्धित कानुन, नेपाल राष्ट्र बैंकका निर्देशन तथा नियामकीय मापदण्डअनुसार हुने र आगामी दिनमा पनि सोही प्रक्रिया निरन्तर पालना गरिने स्पष्ट पारेको छ।
बैंकले आफ्ना निक्षेपकर्ता, कर्जाग्राही, सेयरधनी, ग्राहक, लगानीकर्ता तथा सम्पूर्ण सरोकारवालाको हित संरक्षणप्रति आफू प्रतिबद्ध रहेको उल्लेख गर्दै बैंकसम्बन्धी कुनै पनि सूचना वा समाचारका लागि बैंकबाट जारी गरिएका आधिकारिक सूचना तथा विश्वसनीय स्रोतलाई मात्र आधार बनाउन आग्रह गरेको छ।
त्यस्तै, सञ्चारमाध्यमलाई पनि कुनै समाचार प्रकाशन वा प्रसारण गर्नुअघि त्यसको सत्यता, तथ्यपरकता र विश्वसनीयता सम्बन्धित पक्षसँग पुष्टि गर्न अनुरोध गरिएको छ। अनुमान, अपुष्ट स्रोत वा एकपक्षीय सूचनाका आधारमा समाचार सम्प्रेषण गर्दा वित्तीय प्रणालीप्रति अनावश्यक भ्रम र नकारात्मक प्रभाव पर्न सक्ने बैंकले जनाएको छ।
प्रभु बैंकले संविधानद्वारा प्रत्याभूत प्रेस तथा अभिव्यक्ति स्वतन्त्रताको पूर्ण सम्मान गर्ने उल्लेख गर्दै सत्य, निष्पक्ष, सन्तुलित तथा तथ्यमा आधारित पत्रकारिताको पक्षमा आफू सधैं रहेको जनाएको छ। साथै, बैंकसम्बन्धी समाचार सम्प्रेषण गर्दा उच्च व्यावसायिक संवेदनशीलता, तथ्यपरकता र जिम्मेवारीका साथ अघि बढ्न सञ्चारमाध्यमलाई अनुरोध गरेको छ।
काठमाडौं । स्पेनले अर्जेन्टिनालाई १–० ले पराजित गर्दै सन् २०२६ को फिफा विश्वकपको उपाधि जितेपछि विश्व फुटबलमा युवा स्टार लामिन यामाल सबैभन्दा बढी चर्चामा रहे। फाइनलमा... विस्तृतमा
