बनेपामा टिपरको ठक्करबाट स्कुटर चालकको घटनास्थलमै मुत्युः आफन्तले टिपरमा लगाए आगो, अवस्था तनवग्रस्त

काठमाडौं । बनेपा बजारस्थित दूरसञ्चार कार्यालय नजिकै टिपरको ठक्करबाट स्कुटर चालकको घटनास्थलमै मृत्यु भएको छ।

प्रहरीका अनुसार बागमती प्रदेश ०१००४ क ३४२३ नम्बरको टिपरले बागमती प्रदेश ०२९०६३ प ९१८९ नम्बरको स्कुटरलाई ठक्कर दिएको हो। दुर्घटनामा स्कुटर चालकको घटनास्थलमै ज्यान गएको प्रहरीले जनाएको छ भने एक जना अन्य व्यक्ति घाइते भएका छन्।

मृतकलाई उद्धार गरी सिर मेमोरियल अस्पताल लगिएको थियो। दुर्घटनापछि स्थानीयवासी आक्रोशित बन्दै टिपरमा आगजनी गरेका छन्। साथै मृतकका आफन्तले सडक अवरुद्ध गरेपछि क्षेत्रको अवस्था केही समय तनावग्रस्त बनेको छ।

दुर्घटनापछि टिपर चालक फरार रहेको प्रहरीले जनाएको छ। घटनास्थलमा प्रहरी परिचालन गरी स्थिति नियन्त्रणमा लिने प्रयास भइरहेको छ।

सडक अवरुद्ध हुँदा बनेपा क्षेत्रको सवारी आवागमनसमेत प्रभावित भएको छ। प्रहरीले घटनाबारे थप अनुसन्धान भइरहेको जनाएको छ।